Samþykkt ráðherra fyrir bí

Samþykkt heilbrigðis- og félagsmálaráðherra á Norðurlöndum um áfengismál frá átjánda október er fokin út í veður og vind með hækkun áfengisskatts hér á landi en stórfelldri lækkun á sama skatti í hinum norrænu ríkjunum.  Í þeirri samþykkt fólst að beita hækkunum á áfengisskatti til að draga úr áfengisneyslu. Við það tækifæri sagði Jón Kristjánsson heilbrigðisráðherra að þar sem skatturinn væri svo hár hér á landi þyrfti ekki að hækka hann hér - það væri þá fyrst og fremst á hinum Norðurlöndunum. Þetta er nú að engu orðið og berast nú mótmæli við hækkuninni úr ýmsum áttum. Heimdallur, félag ungra Sjálfstæðismanna, harmar þá ákvörðun stjórnvalda að hækka áfengisskatt sem fyrir hafi verið sá hæsti í heiminum. Hann hafi síðast verið hækkaður um 15% árið 2002 og nú um 7%. Þetta gerist á sama tíma og Danir hafi verið að lækka áfengisskatt um 45%, Finnar um 33% og Svíar stefni að 30-40% lækkun. Heimdallur segir það skjóta skökku við að í kjölfar fyrirhugðra tekjuskattslækkunar grípi stjórnvöld til þess ráðs að hækka neysluskatta í stað sparnaðar í ríkisrekstrinum. Neysluskattur á borð við þennan byggist á forsjárhyggju ríkisins gagnvart þegnum sínum og skerði frelsi þeirra til sjálfstæðra ákvarðana. Þá telja Samtök ferðaþjónustunnar hækkunina ganga þvert á þá yfirlýstu stefnu stjórnvalda að ferðaþjónustunni á Íslandi verði sköpuð sambærileg rekstrarskilyrði og gilda í samkeppnislöndunum.