Gervihné ein besta uppfinningin

Gervihné með gervigreind frá Össuri er ein athyglisverðasta uppfinning ársins, að mati Time Magazine, en slíkt hné gjörbyltir göngulagi og möguleikum þeirra sem þurfa að nota gervifót. Ungur verktaki, sem missti fótinn eftir að hafa klemmst á milli bíla, segist geta unnið öll verk á slíkum fæti. Þá er Össur byrjaður að þróa nokkurs konar gervivöðva. Með þessu nýja hné er framleiðslan hjá Össuri komin á nýtt tæknistig. Þróun hnésins hefur staðið yfir í 4 ár. Árlegt blað Time Magazine þar sem fjallað er um áhugaverðustu uppfinningar ársins kom út í dag og þar er þetta gervihné, með gervigreindinni meðal þess athyglisverðasta. Hilmar B. Janusson, framkvæmdastjóri hjá Össuri, segir hnéð nema það álag sem lagt er á það og það aðlagi sig síðan að göngulagi þess sem ber hnéð og aðlagist einnig öllu óvæntu sem kunni að koma upp. Upplýsingar fyrir hnéð eru mataðar inn í lófatölvu, þannig að hnéð virki sem best fyrir þann sem notar það og fyrir þær aðstæður sem hann er við. Eitt að því sem þeir sem eru með gervifót, hafa þurft að kljást við eru misfellur. Hilmar segir þetta vandamál að miklu leyti úr sögunni með hinu nýja hné, sem byggi á algerlega nýrri tækni. Davíð Örn Ingvason missti annan fótinn þegar hann klemmdist á milli bíla við Þjórsárbrú árið 2000. Hann hefur um hríð notað nýja hnéð og segir muninn gríðarlega mikinn. Hnéð láti mjög vel að stjórn og hann detti nánast aldrei núorðið, en áður hafi hann dottið á degi hverjum. Davíð Örn vinnur sem verktaki fyrir bændur, þar sem hann þarf að ganga á mishæðóttu yfirborði og við margvíslegar aðstæður, en hann segir það ekki hamla sér við það að vera með svona gervifót. Þá segir hann fólk sem ekki veit að hann er með gervifót, almennt ekki taka eftir því. Hann segist hafa verið þrjá daga með 15 manna hóp í Danmörku og enginn hafi verið búinn að átta sig á því að hann væri með gervihné. Þessi nýja tækni mun nýtast fyrir fleiri liðamót en bara hné. Auk þess er Össur farinn að þróa gervivöðva. Hilmar segir að verið sé að þróa búnað sem kemur með hreyfingu og mun flytja þessa tækni upp á næsta stig.