Beðið eftir að veður lægi

Rútan sem fauk út af Akrafjallsvegi í morgun er enn á hvolfi utan vegar. Að sögn lögreglu- og björgunarsveitarmanna er beðið eftir að veður lægi áður en reynt verður að ná henni af slysstað, skammt frá bænum Reyni, u.þ.b. 3-4 kílómetra frá Hvalfjarðargöngum. Eins og greint hefur verið frá hér á Vísi voru tuttugu og sjö manns fluttir á sjúkrahúsið á Akranesi eftir að rútan, með starfsmenn álversins á Grundartanga innanborðs, fauk út af Akrafjallsvegi um sjöleytið í morgun. Að sögn Ragnars Guðmundssonar, framkvæmdastjóra stjórnunarsviðs álversins, var ákveðið að fara með tvo hinna slösuðu til aðhlynningar í Reykjavík eftir að á Akranes var komið. Fjörutíu og einn maður var í rútunni og voru allir með meðvitund og enginn í lífshættu. Fólksbifreið fór jafnframt út af skömmu áður á svipuðum slóðum. Ökumaður bílsins sagði í samtali við fréttamann á vettvangi að hann hafi keyrt þarna daglega síðastliðin fjögur ár og hafi aldrei kynnst öðru eins veðri. Hægt er að hlusta á fréttamann Stöðvar 2 og Bylgjunnar tala frá vettvangi með því að smella á hlekkinn hér að neðan.