Ekki slys eða bilun

Grunsemdir um að slys eða bilun hafi orðið um borð í einhverju rússnesku herskipanna sem eru norðaustur af landinu eru ekki á rökum reistar, samkvæmt upplýsingum frá rússneskum hermálayfirvöldum. Fréttastofan hefur í dag leitað eftir svörum hjá rússneskum hermálayfirvöldum um æfingarnar norðaustur af landinu, en hjá varnarmálaráðuneytinu í Moskvu var ekki svarað. Heimildamenn sem fréttastofan telur trausta fullyrða hins vegar að ekkert sé óeðlilegt við æfingarnar og að bilun sé ekki ástæða þess hversu þær virðast dragast á langinn. Vladimir Navrotskiy, talsmaður Norðurflotans, undrast að íslensk yfirvöld skuli ekki vita allt um æfingarnar þar sem þeim hafi verið gerð ítarlega grein fyrir fyrirætlunum Rússanna og þau boð send eftir hefðbundnum leiðum. Tvö skip, sem voru á leið frá Evrópu og sagt var að skipin hér við land væru að bíða eftir, virðast hins vegar hafa verið fljótari í ferðum en fyrst var gert ráð fyrir því að þau komu til Severomorsk, heimahafnar Norðurflotans, í morgun. Hin skipin eiga að snúa til heimahafnar þann tuttugasta og fimmta þessa mánaðar en þá lýkur því sem talsmenn hersins segja umfangsmestu æfingar Norðurflotans í átta ár. Hjá norsku kjarnorkurannsóknarstofnuninni Bellona hafa menn fylgst með hreyfingum flotans. Igor Kudrik, sérfræðingur þar, sagði í samtali við fréttamann að heimildarmenn hans segðu einungis um æfingu að ræða.