Rússarnir komnir aftur

Algjör óvissa ríkir enn um hversu lengi rússnesku herskipin verða hér við land. Skipstjórar þeirra gefa misvísandi upplýsingar og þau skip sem farin voru eru komin aftur. Rússneskir blaðamenn vita ekkert um æfinguna við Íslandsstrendur en jafnan er fjallað ítarlega um æfingar hersins í rússneskum fjölmiðlum. Hálfgert stefnuleysi einkennir ferðalög rússnesku herskipanna. Þrjú þeirra, þar á meðal flugmóðurskipið Admiral Kuznetzov, yfirgáfu svæðið þar sem skipin hafa verið við æfingar í fyrradag og í gær en í morgun voru þau á ný komin á svæðið og var ekkert fararsnið á þeim. Skipherrann á kjarnorkuknúna beitiskipinu Pétri mikla hafði áður sagt við Landhelgisgæsluna að hann myndi halda frá Íslandi í gærkvöld, en af því varð ekki. Samkvæmt upplýsingum Landhelgisgæslunnar í morgun stendur nú til að skipin verði á svæðinu í fjóra daga til viðbótar. Þau eru sem fyrr nokkrar mílur fyrir utan 12 mílna landhelgislínuna og fylgist varðskip með framvindu mála. Rússar segjast hafa viljað æfa í grennd við Ísland í öryggisskyni þannig að stutt væri í aðstoð, ef eitthvað færi úrskeiðis. Viðmælendur fréttastofunnar sem þekkja til hermála undrast ekki að Rússar vilji æfa í nánd við land en segja margt í fari Rússanna þó dularfullt í meira lagi. Undrum sæti að þeir skuli ekkert gefa uppi um hvað þeir hafist í raun að, upplýsingarnar sem rússneska sendiráðið fær þykja afar takmarkaðar og siglingar herskipanna fram og til baka vekja spurningar um hversu skipulagðar æfingarnar séu. Að auki gefa skipstjórar skipanna misvísandi upplýsingar um hvenær þeir hyggjast halda á brott, allt frá sólarhring til fjögurra daga. Rússneskir fjölmiðlar greindu einnig ítarlega frá sameiginlegum æfingum Bandaríkjamanna og Rússa fyrir um hálfum mánuði en hvergi er minnst orði á æfingarnar við Ísland. Rússneskir blaðamenn sem fréttastofan ræddi við í dag komu reyndar af fjöllum þegar þeir heyrðu af veru flotans hér við land og þótti það mikil tíðindi. Herskipin eiga að koma aftur í heimahöfn 25. október og nokkur rússnesk skip sem verið hafa í heimsókn í Evrópu eru nú á heimleið. Búist er við að þau bætist í hópinn, sem nú er úti af ströndum Íslands, á leiðinni.