Engir ábyrgðarmenn

Námsmenn þurfa ekki lengur ábyrgðarmenn vegna lána úr Lánasjóði íslenskra námsmanna. Samkvæmt samkomulagi fulltrúa sjóðsins við Landsbanka íslands sem undirritað var núna á hádegi tryggir Landsbankinn nú námslánin. Steingrímur Ari Arason, framkvæmdastjóri LÍN, segir að nú þurfi námsmenn ekki skilyrðislaust uppáskrift frá ábyrgðarmanni, þar sem Landsbankinn ábyrgist nú lánið á sama hátt og ábyrgðarmaður gerði áður. Steingrímur segir skilyrði slíkrar uppáskriftar vera að viðkomandi greiði ábyrgðargjald og að bankinn sem í hlut eigi gangi væntanlega út frá því að námsmaðurinn sé í viðskiptum við bankann.