Engin skýring á neyðarsendingum

Engin skýring hefur fundist á því að gervitungl fóru að nema neyðarsendingar frá höfninni í Grindavík í gærkvöldi, þrátt fyrir víðtæka eftirgrennslan. Sendingarnar fóru að heyrast laust fyrir klukkan átta og kallaði tilkynningaskyldan Björgunarsveitina Þorbjörn út, sem mannaði þegar björgunarskipið Odd V. Gíslason, og hélt það til leitar. Flugvél Flugmálastjórnar var líka kölluð út, en hún er búin mjög nákvæmum tækjum til að miða út neyðarsendingar. Samkvæmt hennar miðunum komu sendingarnar frá tilteknum báti í Grindavíkurhöfn. Farið var um borð í hann og björgunarbáturinn tekinn í land og farið með hann þó nokkra leið á gúmmíbátaverkstæði til að kanna neyðarsendinn í honum, en þá brá svo við að sendingarnar héldu áfram frá bátnum sjálfum. Hófst þá mikil leit um borð, en um miðnætti tóku sendingarnar að dofna og dóu svo út, án þess að leitin bæri árangur. Síðan hefur ekkert heyrst, og vona menn að þetta sé liðið hjá, þótt þeir sakni skýringarinnar á þessu öllu saman.