Undanþágubeiðnir aldrei fleiri

Undanþágubeiðnir vegna starfa á íslenskum skipum hafa aldrei verið fleiri en nú og stefnir í metár haldi svo fram sem horfir. Farið hafði verið yfir tæplega þúsund umsóknir hjá Siglingastofnun í gær og enn fleiri biðu umsagnar. Dæmi eru um að sömu menn fái undanþágur ár eftir ár. Undanþágur veitir fimm manna nefnd sem samgönguráðherra skipar í og setur reglur um en allar umsóknir fara þó fyrst Þórður Þórðarson, fulltrúi hjá Siglingastofnun Íslands, sem yfirfer umsóknir segir þær orðnar fleiri en í meðalári en verið geti að það breytist nú þar sem frá og með 1. september sé útgerðum sem eftir slíkum undanþágum sækja gert að greiða sérstakt gjald fyrir. "Fjöldinn er vissulega mikill en núna þarf að greiða ákveðið gjald fyrir og verið getur að það hefti eitthvað þann fjölda sem sækir um. Annað í þessu er að hluti þeirra sem sækja um eru með fullgild réttindi en menn hafi sýnt kæruleysi og gleymst hefur að endurnýja þau. Þá er þessum mönnum gert að sækja um undanþágu meðan sýslumenn afgreiða umsókn um endurnýjun og nefndarmenn eru ósáttir við það." Guðjón Ármann Einarsson, framkvæmdastjóri Félags skipstjórnarmanna, segir að þrátt fyrir að fjöldi undanþága undanfarin ár hafi verið um og yfir þúsund talsins megi ekki gleyma því að þar getur verið um einn og sama manninn að ræða í mörgum tilfellum. "Viðkomandi undanþágur eru aðeins veittar sex mánuði í senn og síðan verður að sækja um aftur þannig að þarna er ekki um þúsund menn að ræða. Þó er sá hængur á öllum undanþágum að engar slíkar eru veittar ef maður með réttindi sækir einnig um." Réttindamenn virðast af afar skornum skammti sé miðað við að útgerðir margra af stærstu fiskiskipum flotans sækja reglulega um undanþágur. Hafa ýmsir haft á orði að þessi aukning undanþága stríði beint gegn meginhlutverki Siglingastofnunar sem er að skapa hagkvæmar og öruggar aðstæður til siglinga og fiskveiða við landi.