Veiðigjaldið hafi ekki slæm áhrif

Friðrik Már Baldursson hagfræðingur segir að veiðigjald sem lagt verður á útgerðir sé ekki svo íþyngjandi að það hafi slæm áhrif á afkomu þeirra. Ari Edwald, framkvæmdastjóri Samtaka atvinnulífsins, segir hins vegar að álögur á borð við veiðigjaldið hljóti að þrengja að starfsskilyrðum greinarinnar. Rúmlega 900 milljóna króna veiðigjald verður lagt á útgerðirnar í fyrsta skipti í haust og er það að hluta til hugsað sem hlutdeild í þeim kostnaði sem ríkið leggur fram til eftirlits og rannsókna í sjávarútveginum. Gjaldið er sett fram sem tilraun til að ná sáttum um þessi mál en við útreikning á því er tekið mið af aflaverðmæti síðasta árs og aflaheimildum næsta árs. Það nemur 6% í fyrsta skipti og hækkar síðan og verður 9,5% árið 2009. Forsvarsmenn útgerðarfyrirtækjanna óttast að gjaldtakan geti reynst fyrirtækjunum erfið. Friðrik Már Baldursson hagfræðingur, sem var formaður kvótanefndarinnar svokölluðu sem skipuð var til að endurskoða lögin um stjórn fiskveiða, telur að gjaldið muni ekki reynast útgerðunum þungur baggi. Hann segir að eins og gjaldið var reiknað út sé það hugsað sem hóflegt afgjald útgerðarinnar fyrir hinni sameiginlegu auðlind landsmanna.   Ari Edwald, framkvæmdastjóri Samtaka atvinnulífsins, segir að sérstakar álögur á borð við veiðigjaldið hljóti að þrengja að starfsskilyrðum greinarinnar. Hann bendir á að hér sé um að ræða útflutningsatvinnugrein sem sé fyrst og fremst með starfsemi úti á landsbyggðinni. Undanfarin misseri hafi skilyrði í sjávarútveginum verið mjög slök, m.a. út af háu gengi krónunnar, háu olíuverði og lélegu aflaverði.