Verðum að herða vörnina

David James, markvörður enska landsliðsins, segir að Englendingar verði að herða vörnina ef þeir ætli sér að halda markinu hreinu gegn Portúgölum í fyrsta leik átta liða úrslitanna á EM í kvöld. Mörkin fjögur sem enska liðið skoraði gegn Króötum um helgina skyggðu á þá staðreynd að enska liðið hefur fengið á sig fjögur mörk á EM og hafa þau öll komið eftir föst leikatriði andstæðinganna. "Við verðum að læra af mistökunum sem við gerðum í riðlakeppninni og það strax, því við erum að mæta Portúgölum sem hafa frábæra spyrnumenn," segir James. Þessi umdeildi markvörður var nokkuð gagnrýndur fyrir að hafa ekki gert betur í aukaspyrnu Zinedine Zidane í leiknum gegn Frakklandi, og viðurkenndi James að hann hefði ekki verið búinn að kortleggja spyrnur Zidane. "En ég mun breyta því núna. Ég er þegar byrjaður á minni heimavinnu og hef legið yfir myndböndum af aukaspyrnum frá Luis Figo," segir James. "Föst leikatriði ráða mjög oft úrslitum í leikjum og bæði lið vilja nýta þau til hins ítrasta". Taugaspennan er einnig að gera meira vart við sig í herbúðum heimamanna í Portúgal, og segir Nuno Gomes, hetja Portúgala frá því í leiknum gegn Spánverjum, að enska liðið sé mun betra nú en í EM árið 2000, en þá voru það einmitt Portúgal sem slógu Englendinga út úr keppninni. "Sá leikur var einn sá mikilvægasti sem ég hef spilað á mínum ferli," segir Gomes, en þá var hann í fyrsta skipti í byrjunarliði Portúgala og þakkaði traustið með því að skora eitt mark af þremur í magnaðri endurmkomu liðsins eftir að hafa lent 2-0 undir. "Þessi leikur kenndi mér mjög margt og ég fékk reynslu af því að spila á móti mönnum á borð við Tony Adams og Alan Shearer. Lið þeirra í dag er yngra og betra og eru leikmenn vanir því að spila undir pressu," segir Gomes, en hann verður að öllum líkindum í byrjunarliði Portúgala þar sem sóknarmaður númer eitt, Pauleta, er í leikbanni.