Átta af tíu lokaársnemum féllu

Lektor við Tækniháskóla Íslands hefur sent menntamálaráðherra bréf þar sem hann greinir frá þeirri ákvörðun rektors háskólans að skipa rannsóknarhóp sérfræðinga til að "fara ofan í saumana á prófum, prófsyfirferð, samræmi milli námskeiðs og prófa og fleiru sem þurfa þykir," eins og sagt er í bréfi til kennara skólans. Hann segir rektor grípa til ólöglegra aðgerða þar sem aðeins nemendur og kennarar megi fara fram á að prófniðurstöður séu skoðaðar. Rektor er honum ósammála. Víðtæk stjórnunarheimild sé til að grípa inn í mál. Friðrik Eysteinsson, lektor og sviðstjóri markaðsgreina við THÍ, segir Stefaníu Katrínu Karlsdóttur rektor grípa til ólöglegra aðgerða vegna þess hversu margir féllu. "Hún ætlar ekki að athuga hvers vegna þeir féllu heldur er hún búin að ákveða að þetta sé mér og hinum kennaranum í áfanganum að kenna." Stefanía Katrín Karlsdóttir, segir nemendurna hafa óskað eftir aðgerðum. "Ég væri ekki að gera þessa hluti ef að þetta væri ólögmætt." Stefanía segir að ekki sé um skyldiákvörðun að ræða. "Það eru margir lögfræðingar sem koma að málum. Ef ég hefði ekki gripið til þessara aðgerða þá væri ég að bregaðst mínum starfsskyldum gagnvart nemendum. Það er mjög alvarlegt mál þegar úskriftarnemendur eru að falla með þessum hætti." Hátt fall var í öllum fimm áföngum fyrri annar síðasta skólaárs nemendanna segir Friðrik. "Þetta eru fimm áfangar, Það féllu 20% í alþjóðamarkaðsfræði, 35% í verðlagningu, 58% í sölustjórnun, 63% í stefnumótun markaðsmála og 80% í vörumerkjastjórnun." Fiðrik kenndi tvo áfangana þar sem fallið var mest. Nemendur falli nú á loka ári þar sem það sé meðal annars kennt á ensku. "Þau ráða ekki við þetta. Þau skilja annars vegar ekki það sem er spurt um að hluta til og eiga hins vegar erfitt með að koma því frá sér. Þau eru vön því fyrstu tvö árin að vera í svo kölluðum glæruprófum þar sem kennararnir eru í sumum tilfellum búnir að gefa þeim upp nákvæmlega hvaða glærur koma til prófs. Ég get ekki verið sakaður um að stunda ekki fagleg vinnubrögð þegar ég er að passa upp á það að fólk með ónóga þekkingu komist inn á vinnumarkaðinn."