Hunda leitað

Hundaeftirlit Reykjavíkurborgar leitar tveggja hunda sem rifu í sig heimiliskött í Seljahverfi fyrir helgi. Fólk í hverfinu hefur ítrekað kvartað yfir því að hundarnir gangi lausir. Ævi heimiliskattarins Pjakks fékk snöggan endi þegar hundarnir eltu hann milli garða í Steinaseli. Hann var stór og feitur og svo virðist sem hann hafi ekki náð að smeygja sér yfir girðingu í skjól. Steinn Sigurðsson, eigandi kattarins segir afar sárt að missa á eftir kettinum sínum, sem hafi verið hvers manns hugljúfi. Vissulega eru til dæmi um að hundar hafi banað köttum, jafnvel hundar í taumi. Litlir kærleikar eru milli hunda og katta og oft óljóst hvor tegundin á upptökin að átökum. Hundarnir í Seljahverfi munu þó oftsinnis hafa gengið um lausir og vakið ótta meðal íbúa. Um er að ræða hunda af Rottweiler og Doberman kyni. Hvorugur er skráður eða tryggður. Vegna kvartana hefur hundaeftirlitsmaður rætt við eiganda annars þeirra og farið fram á úrbætur en hann er enn óskráður og gekk laus þegar hann náði í skottið á Pjakki. Steinn segist ekkert hafa á móti hundum, en þessir hundar séu einfaldlega ekki gæludýr, þeir séu mjög hættulegir. Að sögn Guðmundar Friðrikssonar, deildarstjóra Dýraeftirlits í borginni voru hundarnir teknir frá eigendum sínum í dag. Hann segist efast um að málinu ljúki með því að þeir fái skráningu. Samkvæmt samþykktum um hundahald í Reykjavík mun dýralæknir eða hundaþjálfari meta hvort þeir eru hættulegir. Teljist þeir vera það, verður þeim lógað.