Of lítið samráð innan Framsóknar

Tveir þingflokksfundir hafa verið afboðaðir hjá Framsóknarflokknum undanfarna viku þar sem tilkynna átti um breytingar á nefndarsetum þingmanna. Sumir þingmanna flokksins telja of lítið samráð hafa verið haft við þingmenn vegna málsins en endanleg ákvörðun verður tilkynnt á þingflokksfundi á þriðjudag. Aðeins fimm dagar eru í að þingstörf hefjist á nýjan leik. Eftir ráðherraskiptin þann 15. september verða óbreyttir þingmenn Framsóknarflokksins sjö í stað sex áður. Það liggur því fyrir að einhverjar breytingar verða á nefndarsetum þingmanna flokksins og ljóst að einhverjir verða að víkja, enda þarf að finna einhverjar nefndir fyrir fyrrverandi umhverfisráðherra. Þeir þingmenn sem fréttastofa ræddi við í dag sögðu enga ákvörðun hafa verið tilkynnta þingmönnum en boðað hefði verið til þingflokksfundar á þriðjudag þar sem stjórn þingflokksins hyggðist kynna þingmönnum þær breytingar sem ættu að verða á nefndarsetum þingmanna. Tvívegis hefur verið boðað til funda vegna málsins undanfarna viku en í bæði skiptin hafa fundirnir verið afboðaðir jafnharðan. Þingmenn eru ekki á einu máli um ástæðuna. Á meðan sumir segja afboðanirnar einfaldlega stafa af fríum þingmanna eru aðrir á því að ástæðan sé sú að stjórn þingflokksins eigi í vandræðum með að komast að niðurstöðu. Að minnsta kosti tveir þingmanna Framsóknarflokksins segja ekkert samráð hafa verið haft við sig vegna málsins og segja að fleiri séu í þeirri stöðu. Það verði því ekki formsatriði þegar ákvörðunin verðu tilkynnt á fimmtudag, eins og það ætti að vera, og viðbúið sé að einhverji muni ganga ósáttir út af fundinum. Flestir eru þingmennirnir þó ánægðir með að nefndarsetum þeirra fækki, enda hafa einstakir þingmenn setið í allt að fimm nefndum. Hvort þeir verða látnir víkja úr þeim nefndum sem þeir vilja víkja úr er hins vegar allt annað mál, sem ekki skýrist fyrr en á þriðjudag.