Hitinn hættulegur páfa

Skipuleggjendur heimsóknar Jóhannesar Páls páfa II. til Lourdes í Frakklandi hafa nokkrar áhyggjur af áhrifum hitabylgju á páfa og þá þrjú hundruð þúsund pílagríma sem komnir eru til bæjarins vegna heimsóknarinnar. Hitinn er kominn vel yfir þrjátíu stig og eru gestir hvattir til að drekka mikið vatn og skýla sér fyrir sólinni. Páfi sjálfur átti í gær erfitt með að sinna verkefnum sínum og féll næstum því þegar hann kraup við helli þar sem María mey á að hafa birst árið 1858. Páfi sést hér biðja við umræddan helli í Lourdes í gær.