Kristján Guðmundsson: Get enn mótíverað liðið

Svo gæti farið að Kristján Guðmundsson þjálfari Keflavíkur hafi verið að stýra liðinu í sínum síðasta leik, þegar Keflavík skellti ÍBV, 6-1, en framtíð hans ræðst í byrjun næstu viku.

"Það opnuðust allar flóðgáttir í lokin. Það var frábært hjá strákunum að ná að spila svona í þessum ísakulda og mikla vindi. Ég er mjög sáttur við strákana að ná að halda einbeitingu og klára tímabilið svona fyrir framan okkar áhorfendur," sagði Kristján.

"Við fórum inn í klefa í hálfleik skjálfandi úr kulda og unnum í því að halda hita í leikmönnum svo þeir kæmu tilbúnir út í leikinn og einbeittir og það kom kafli þar sem við röðuðum inn mörkum. Frábært að strákarnir hafi tekið síðasta leikinn svona því við höfum fengið mikla gagnrýni fyrir að vera ekki að spila vel og ömurlegur árangur og allt þar fram eftir götunum en árangurinn er ekki alómögulegur. Við ásamt FH erum með bestan árangur á heimavelli og það hefur verið mikið rætt um að við höfum ekki unnið útileik, það er rétt en það er annað lið sem hefur ekki heldur unnið útileik í deildinni og það eru fjögur önnur lið sem hafa fengið færri stig en við á útivelli heldur en við. Það er hægt að taka tölfræði og snúa henni á alla vegu, sér í hag og óhag," en útivallar árangurinn varð til þess að Keflavík tók ekki þátt í toppbaráttunni í sumar.

"Það er alveg rétt og það skilur á milli að við fengum á okkur of mörg mörk, það er einfalt."

"Framtíðin ræðst á mánudag, þriðjudag. Ákvörðunin sem verður tekin verður tekin út frá hagsmunum Keflavíkur. Núna leggst ég undir feld en það var mikilvægt fyrir okkur að fara í gegnum þessa síðustu leiki, eftir að hafa fallið út úr bikarnum, án þess að tapa. Það skipti miklu máli að það sást að ég get ennþá mótíverað liðið. Það skiptir miklu máli," sagði Kristján að lokum.