Helgi Sig: Allra erfiðasta tímabilið á ferlinum

Helgi Sigurðsson og aðrir Valsmenn náðu ekki að vinna sigur í síðustu sjö heimaleikjum sínum á tímabilinu og hann gat ekki leynt vonbrigðum sínum eftir 2-5 tap á Vodafone-vellinum á móti KR í lokaumferð Pepsi-deildar karla í dag.

„Við vorum langt um frá nógu góðir í fyrri hálfleik og vorum bara ekki með. Í seinni hálfleik komum við sterkir út og náðum að minnka þetta í 3-2 og þá fannst ég við hafa tök á þeim. Svo fáum við á okkur ódýrt rautt spjald sem gerir þetta okkur enn þá erfiðara fyrir. Eftir að þeir skoruðu fjórða markið þá var þetta orðið mjög erfitt," sagði Helgi Sigurðsson eftir leikinn.

„Ég var sáttur við seinni hálfleikin hjá okkur miðað við allt og allt en fyrri hálfleikurinn var ömurlegur. Það er bara eins og tímabilið okkar er búið að vera í hnotskurn. Við höfum ekki náð nógu löngum köflum góðum. Við höfum átt góða kafla inn á milli en það hefur sjaldan verið heill leikur sem hefur verið í góðu lagi," sagði Helgi sem viðurkenndi að hafa ekki gengið í gegnum erfiðara tímabil á sínum langa ferli. Valsliðið vann sem dæmi aðeins einn deildarleik frá 22. júní.

„Þetta er örugglega eitt það erfiðasta sem ég hef gengið í gegnum á ferlinum. Maður hefur lent í miklu mótbyr um ævina í fótboltanum þar sem hlutirnir hafa ekki gengið nógu vel. Ég held að þetta tímabil sé það sem hefur verið það allra erfiðasta fyrir margar sakir," segir Helgi sem hrósaði þó móralnum í liðinu og að menn hafi reynt að gera sitt besta. "Staðan lýgur samt ekki við erum í 8. sæti sem er alls ekki nógu gott fyrir Val," sagði Helgi sem var ekki að kveðja Valsmenn í gær.

„Það verður að koma í ljós hvort þetta var síðasti leikurinn fyrir Val. Ég á eitt ár eftir og ég er búinn að vera markahæstur hjá liðinu þrjú ár í röð með mark í öðrum hverjum leik. Ef Valur vill skoða það að láta mig fara þá verður það bara koma í ljós. Ég hef ekkert spáð í það sjálfur því ég er bara Valsmaður í dag og á eitt ár eftir af mínum samningi. Ég býst við að vera hérna áfram eins og staðan er núna," sagði Helgi að lokum.