Bjarni Jó: Flott fyrri umferð bjargaði okkur

„Mér fannst bæði lið vera að reyna spila boltanum þegar þau spiluðu á móti vindi, við reyndum að halda boltanum niðri, en svona heilt yfir þá vorum við sterkari aðilinn í dag og hefðum átt að vinna þennan leik," sagði Bjarni, þjálfari Stjörnunar eftir 1-1 jafntefli gegn Fjölni.

Stjörnumenn voru frábærir í fyrri umferð sumarsins og voru vel og lengi í toppbaráttunni að stríða stóru liðunum.

„Maður hefði viljað gera betur í seinni umferðinni, en fyrri umferðin var bara svo ofboðslega flott hjá okkur og það dugði til að halda okkur, frábær sóknarleikur skóp þetta sæti okkar í ár," sagði Bjarni, sem á eitt ár eftir af samningi sínum við Stjörnuna.

„Ég á eitt ár eftir og við vonum það að allir þessir leikmenn sem eru núna hérna verði áfram, flestir eru með samninga en síðan vonandi tekst okkur að styrkja þetta eitthvað," sagði Bjarni Jóhannsson sem ætlar að styrkja liðið fyrir næsta sumar.

„Ég ætla klárlega að fá nýja leikmenn, klárlega."