Meintur morðingi framseldur

Meintur morðingi Zorans Djindjic, forsætisráðherra Serbíu, verður framseldur frá Grikklandi til Serbíu von bráðar. Dejan Milenkovic var handtekinn í Þessalóniku á Grikklandi fyrr á þessu ári en hann er talinn lykilmaður innan mafíuhóps sem talinn er bera ábyrgð á morðinu á Djindjic.

Siðanefnd kærir úrskurðinn

Siðanefnd Háskóla Íslands hefur ákveðið að kæra úrskurð Héraðsdóms Reykjavíkur frá því í liðinni viku þess efnis að sýslumanni beri að setja lögbann á umfjöllun siðanefndar um bók Hannesar Hólmsteins Gissurarsonar um Halldór Laxness.

Bolvíkingar búnir að safna fénu

Bolvíkingar hafa safnað nægu fé fyrir sjónvarpssendi Skjás eins í Bolungarvík en eins og áður hefur verið greint frá þurftu heimamenn að afla 900 þúsund króna, eða helming af kostnaðinum við uppsetningu sendisins, að því er vefur Bæjarins besta greinir frá.

Vitnis leitað vegna nauðgunar

Lögreglan í Reykjavík leitar enn að konu sem kann að geta veitt upplýsingar um nauðgun sem kærð var á Menningarnótt. Stúlka um tvítugt segir að tveir menn hafi ráðist á sig um miðnætti og nauðgað sér.

Harka og ósvífni í kapphlaupinu

Harka og ósvífni er komin í forsetakapphlaupið í Bandaríkjunum. Hópar sem tengjast Bush forseta saka John Kerry um að ljúga til um hetjudáðir í Víetnamstríðinu og gefa í skyn að hann sé engin stríðshetja. Kerry segir þetta skítkast úr herbúðum forsetans.

Líklega góðkunningjar lögreglu

Lögreglan í Ósló er engu nær um felustað mannanna sem rændu tveimur þekktustu málverkum Edvards Munchs af safni í Ósló í gær. Þó er talið að ekki séu fagmenn á ferð heldur svokallaðir góðkunningjar lögreglu.

Alvarlega slösuð eftir bílveltu

Kona og unglingspiltur slösuðust alvarlega þegar jeppi fór út af Suðurlandsvegi við bæinn Steina undir Eyjafjöllum í gærkvöld. Fjórir voru í bílnum. Tildrög slyssins eru í rannsókn en sjónarvottar segja að jeppinn hafi ekið um stund á löglegum hraða en skyndilega skrikað til á veginum, farið yfir á rangan vegarhelming og út af vinstra megin.

Guðni vildi ekki víkja Siv

Guðni Ágústsson, varaformaður Framsóknarflokksins, segir þá ákvörðun þingflokksins að Siv Friðleifsdóttir skyldi víkja úr ríkisstjórn hafa valdið mikilli ólgu innan flokksins. Hann leggur áherslu á að þetta hafi ekki verið sú leið sem hann vildi fara.

Moskan á valdi skæruliðanna

Barist er í nánd við Imam Ali moskuna í Najaf í Írak sem er enn á valdi Mehdi-skæruliðasveita Muqtada al-Sadrs. Nokkur óvissa hefur ríkt um hvernig ástandið í Najaf væri í raun og veru og á hvers valdi Imam Ali moskan væri.

Óvenjumargir ísjakar á Húnaflóa

Óvenjumargir stórir borgarísjakar eru nú komnir inn á Húnaflóa. Veðurstofan varar skip og báta við sjóferðum út af norðvestanverðu landinu.

Akstur barna í skólann hættulegur

Um 45 þúsund grunnskólabörn setjast nú á skólabekk eftir sumarleyfi. Hætta getur verið á slysum við skólana en hún stafar ekki síst af því að of margir foreldrar aka börnunum sínum í skólann. 

Yfir 500 íbúðir verða reistar

Ísraelar reisa nú hundrað og tuttugu íbúðir í landnemabyggðum á landssvæðum Palestínumanna í nágrenni Jerúsalem. Samkvæmt heimildum Reuters-fréttastofunnar er stefnt að því að reisa yfir fimm hundruð íbúðir á svæðinu. Bandaríkjastjórn er sögð hafa veitt óformlegt leyfi fyrir þessu.

Sprengjuhótunin dýrt spaug

Boeing 737 þota Íslandsflugs, með 146 farþega innanborðs, þurfti að lenda á flugvellinum í Lyon í Frakklandi í gærkvöld vegna sprengjuhótunar. Þarna var þó um gabb að ræða, eða öllu heldur fremur dýrt spaug. Flugvélin var í leiguflugi á leið frá Napolí til Dyflinnar þegar einn flugliði fann miða á salerni vélarinnar sem á stóð „Sprengja 11. september“.

Fólksfjölgun markmiðið

Bolvíkingar hafa uppi metnaðarfull áform þessa vikuna en í gær var blásið til ástarviku í bænum. Soffía Vagnsdóttir, oddviti minnihlutans í bæjarstjórn, er í forsvari fyrir hátíðina og segir hún að eitt stórt markmið felist með hátíðahöldunum: að fjölga bæjarbúum. Í maí á næsta ári verði svo fylgst grannt með því hvernig fólk hefur staðið sig.

Vill réttarhöldin frá Bagdad

Bandarískur hermaður sem ákærður er fyrir pyntingar og kynferðislega niðurlægingu á írökskum föngum í Abu Ghraib fangelsinu hefur óskað eftir því að réttarhöldin verði færð frá Bagdad. Hermaðurinn, Charles Graner að nafni, segist ekki eiga möguleika á sanngjörnum réttarhöldum í íröksku höfuðborginni og bar þessa ósk því fram í dag.

Jafnaðarmenn harma hvarf Sivjar

Ungir jafnaðarmenn harma niðurstöðu þingflokks Framsóknarflokks um að fækka konum í ríkisstjórn að því er segir í ályktun þeirra sem samþykkt var á landsþingi Ungra jafnaðarmanna í Hveragerði um helgina og send var fjölmiðlum áðan.

Málverkin einhvers staðar í Ósló

Norska lögreglan telur að málverkunum sem stolið var úr Munch-safninu í Ósló í gær hafi verið komið fyrir einhvers staðar í borginni. Tveir vopnaðir menn höfðu útgáfur af frægustu verkum Munchs á brott með sér í gærmorgun, Ópinu og Madonnu. Tugir gesta voru í safninu á þessum tíma og hafa þeir gefið þann vitnisburð að mennirnir hafi borið sig klaufalega.

Fjöldi hvala sést daglega

Hvalir sjást daglega utan við byggðina í Keflavík og Njarðvík. Stórar hvalavöður hafa sést en að sögn Helgu Ingimundardóttur hjá hvalaskoðunarskipinu Moby Dick er mikið æti í flóanum. Síðast í gærkvöldi mátti sjá þrjár hrefnur í æti skammt undan landi. Vefur Víkurfrétta greinir frá þessu.

Þrettán Nepölum rænt í Írak

Þrettán nepölskum ríkisborgurum var rænt í Írak í dag að því er nepalska utanríkisráðuneytið tilkynnti fyrir stundu. Fólkið er allt starfsmenn jórdansks fyrirtækis og hafði verið sent á þess vegum til Íraks til að vinna. Að sögn nepalska utanríkisráðuneytisins var því rænt þegar það var að stíga upp í bifreið, stuttu eftir komuna til landsins. </font />

Fundað vegna fjárlagafrumvarpsins

Þingflokkar Framsóknar- og Sjálfsstæðisflokks koma saman til fundar nú um fjögurleytið til að ræða drög að fjárlagafrumvarpi. Rúmur mánuður er þar til fjárlagafrumvarpið verður lagt fyrir á Alþingi.

Fá ekki heilsdagsvist

Nokkrir tugir barna hafa enn ekki fengið heilsdagsvist í frístundaheimilum Íþrótta- og tómstundaráðs Reykjavíkur (ÍTR) fyrir veturinn. Þetta veldur miklum óþægindum fyrir foreldra sem þurfa að gera aðrar ráðstafanir ef bæði eru útivinnandi.

4200 börn í skóla í fyrsta sinn

Í ár munu rúmlega 4200 börn setjast á skólabekk í fyrsta sinn. Í tilkynningu frá Umferðarstofu segir að þessi börn komi úr öruggu umhverfi heimilis og úr leikskólum þar sem þau hafa leikið sér á lokuðum leikvelli. Mikilvægt sé fyrir foreldra og forráðamenn að undirbúa börnin vel svo þau getið spjarað sig ein.

Hlunnfarnir um milljarð

Bergur Ágústsson bæjarstjóri í Vestmannaeyjum telur að fyrirtæki í Vestmannaeyjum hafi orðið af að minnsta kosti fjögur hundruð milljónum króna á síðustu tveimur til þremur árum vegna sértækra aðgerða í sjávarútvegi. Sé litið lengra aftur er upphæðin yfir einum milljarði.

Fellibylur ógnar Taívan

Líkur eru á að fellibylur gangi yfir Taívan á næstu dögum með tilheyrandi flóðum og aurskriðum. Af þeim sökum hefur verið ákveðið að loka öllum skólum, fjármálamörkuðum og fyrirtækjum í höfuðborginni Taípei og fleiri stöðum í norðvesturhluta landsins á morgun.

Sameining HR og THÍ í burðarliðnum

Forystumenn Tækniháskóla Íslands (THÍ) og Háskólans í Reykjavík (HR) hafa átt í viðræðum undanfarnar vikur um samvinnu eða samruna þessara tveggja háskóla að frumkvæði menntamálaráðuneytisins. 

Stór eiturlyfjabarón handtekinn

Mexíkóska lögreglan hefur handtekið eiturlyfjabarón þar í landi sem grunaður er um að standa fyrir smygli á u.þ.b. helmingi þess magns eiturlyfja sem smyglað er árlega til Bandaríkjanna frá Mexíkó.

Al-Sadr farinn frá Najaf

Muqtada al-Sadr er farinn frá Najaf. Reyndar segir lögreglustjórinn í borginni að hann hafi farið úr Imam Ali moskunni fyrir rúmri viku. Mehdi-hersveitir hans berjast samt áfram og hafa í dag tekist á við bandaríska og írakska hermenn í návígi. Sjónarvottar segja bardagana þá hörðustu síðan átök blossuðu upp í borginni fyrir þremur vikum.

Myndirnar ekki bannaðar

Myndir sem sýna bandaríska hermenn níðast á föngum í herfangelsum í Írak verða ekki bannaðar. Lögmenn hermannanna fóru þó fram á það við frumréttarhöld í Þýskalandi í dag.

Samstarf Og Vodafone og Orkuveitu

Forstjórar Og Vodafone og Orkuveitu Reykjavíkur hafa undirritað viljayfirlýsingu um að félögin eigi samstarf um að ljósleiðaravæða heimili og fyrirtæki í landinu.

Nýjar byggingar í landnemabyggðum

Stjórnvöld í Ísrael tilkynntu í gær að þau munu reisa rúmlega 500 byggingar á Vesturbakkanum, til viðbótar við þúsund nýbyggingar sem einnig munu rísa í landnemabyggðum. Þá kunngjörðu þau að smíði aðskilnaðarmúrsins ljúki ekki fyrr en árið 2005, ári á eftir áætlun. 

Hitasvæði í Eyjafirði rannsakað

Gríðarlega fjölbreytt dýra- og plöntulíf er á jarðhitasvæðinu í Eyjafirði. Búið er að mynda hóp vísindamanna sem á að rannsaka svæðið frekar.

Orkuveitan losar sig við Línu.net

Og Vodafone og Orkuveita Reykjavíkur hafa undirritað viljayfirlýsingu um að félögin eigi samstarf um ljósleiðaravæðingu heimila og fyrirtækja á höfuðborgarsvæðinu.

Bush fordæmir rógsherferð

George W. Bush Bandaríkjaforseti fordæmir sjónvarpsauglýsingar frá einkaaðilum sem gera lítið úr honum eða John Kerry, mótframbjóðanda sínum. Hann hvetur fólk til að láta af slíkum rógi og segir þetta slæmt fyrir kosningarnar.

Skortur á gangbrautum

Víða í höfuðborginni er skortur á gangbrautum. Fjölgun þeirra þarf þó ekki að vera af hinu góða segir verkfræðingur hjá umhverfis- og tæknisviði Reykjavíkurborgar. 

Siv aftur í ríkisstjórn?

Guðni Ágústsson, varaformaður Framsóknarflokksins, vill að formaður flokksins og aðrir forystumenn haldi fund með óánægjuöflum innan flokksins til að freista þess að ná sáttum. Hann segir mikilvægt að fullvissa jafnréttissinna um að Siv Friðleifsdóttir snúi aftur í ríkisstjórn. 

Mannekla í heilsdagsskólum

Sextíu börn í grunnskólum höfuðborgarinnar fá ekki inni í heilsdagsskólum vegna manneklu. Stefnt er að því að leysa málið fyrir mánaðamót.

Forræðisdeila yfir hundum

Sambýlismaður kattakonunnar, Guðrúnar Sigríðar Stefánsdóttur, vill forræði yfir hundum þeirra.Um er að ræða sjö hunda af chihuahua- og labradortegund sem að líkindum verður lógað ef hann fær þá ekki.

Hörmungarnar í Darfúr gætu aukist

Farsóttir gætu aukið enn hörmungar flóttamanna frá Darfur-héraði í Súdan. Þrátt fyrir fögur fyrirheit um bætt ástand eru skæruliðasveitir stjórnvalda enn sagðar á kreiki í Darfur.

Hundruðum nemenda vísað frá

Mörg hundruð nemendur fá ekki vist í framhaldsskólum landsins í haust. Þingmaður Vinstri-grænna segir þetta stríða gegn menntastefnu stjórnvalda þar sem kveðið sé á um að fólk sem horfið hafi frá námi í framhaldsskóla fái tækifæri til þess að taka upp þráðinn að nýju.

Óvissa um skattalækkanir

Ekki liggur endanlega fyrir hvernig staðið verður að skattalækkunum sem kveðið er á um í stjórnarsá<font size="2"></font>ttmála. Fyrstu drög að fjárlögum fyrir næsta ár voru kynnt á þingflokksfundum stjórnarflokkanna sem enn stóðu yfir rétt fyrir fréttir.

Íbúðalán á lægri vöxtum

KB banki býður lán á lægri vöxtum en Íbúðalánasjóður til íbúðakaupa eða endurfjármögnunar á eldri lánum. Ekkert þak er á lánunum en miðað er við að lána ekki meira en sem nemur brunabótamati eignar.

Ásatrúarmenn helga Kárahnjúka

Ásatrúarmenn og náttúruunnendur fjölmenntu við Kárahnjúka í gær og helguðu landið og báðu því griða. Allsherjargoði segir að ekki megi gefast upp, landið og umheimurinn eigi það inni hjá mönnum.

Hugað að sameiningu

Forystumenn Tækniháskólans og Háskóla Reykjavíkur hafa átt viðræður undanfarnar vikur um samvinnu eða samruna skólanna tveggja.

Þrauka frekar en að hækka

;Við höfum ekki í hyggju að hækka fargjöld þrátt fyrir hækkanir olíuverðs. Þó að þetta sé hækkun á einum kostnaðarlið þá reynum við að mæta því með því að minnka kostnað annars staðar," segir Ólafur Hauksson, talsmaður Iceland Express.

Enn beðið eftir áverkavottorði

Rannsókn á líkamsárás sem átti sér stað í Öxnadal fimmta ágúst er á lokastigi að sögn Daníels Snorrasonar, hjá lögreglunni á Akureyri.