Lands­virkjun hyggst bjóða út alla verk­þætti Hvammsvirkjunar í ár

Í kvöldfréttum Sýnar var rifjað upp að tæpur áratugur er liðinn frá því framkvæmdir við Þeistareykjavirkjun og stækkun Búrfellsvirkjunar náðu hámarki. Þegar þeim lauk tók við virkjanahlé hjá Landsvirkjun.

Því lauk í fyrra þegar gerð vindmyllugarðs hófst við Sultartanga auk þess sem undirbúningsframkvæmdir hófust við Hvammsvirkjun. Kærumál hafa hindrað frekari framkvæmdir þar en Landsvirkjunarmenn vonast núna til að það styttist í endanlegt leyfi.

„Við erum komin núna með endurnýjað virkjunarleyfi og því er endurnýjað framkvæmdaleyfi á döfinni hjá okkur líka. Þannig að áætlanir okkar eru á þann veg að við ætlum að fara út með öll útboð þeirrar virkjunar á þessu ári,“ segir Ásbjörg Kristinsdóttir, framkvæmdastjóri framkvæmdasviðs Landsvirkjunar.

Landsvirkjun er raunar þegar búin að bjóða út næsta verkþátt við Hvammsvirkjun, sem er gröftur og jarðvinna vegna stöðvarhúss og stíflustæða. Ásbjörg vonast til að framkvæmdaleyfið fáist í næsta mánuði.

„Við erum úti með þetta útboð núna sem við ætlum að opna í næsta mánuði. Fljótlega í framhaldinu eigum við von á framkvæmdaleyfi og því að framkvæmdir geti hafist á verkstað.“

Landsvirkjun er einnig búin að bjóða út stækkun Sigöldustöðvar sem felur í sér smíði viðbyggingar og gerð þrýstipípu sem og breikkun frárennslisskurðar. Stækka á Sigöldu um allt að 65 megavött eða um 43%.

Þá tilkynnti Landsvirkjun í vikunni að góð vatnsstaða yrði nýtt til þess að stækka aðrennslisgöng Sultartangastöðvar.

„Þetta verkefni sem við hyggjumst fara í núna fyrir Sultartangastöð er eingöngu til þess að bara tryggja minnkun falltapa,“ segir Ásbjörg.

Skammt frá Sultartanga, á Vaðöldu, er unnið að gerð vindmyllugarðs.

„Það eru ákveðin útboð sem eru ennþá eftir fyrir Vaðölduver. Og svo erum við líka að fara af stað með útboð á toppþrýstingsvél á Þeistareykjum.“

Þeirri vél er ætlað að bæta nýtingu á núverandi aflvélum Þeistareykja.

„Þar er í dag aflstöð með tveimur vélum og við viljum síðar meir bæta þar við þriðju og fjórðu vélinni. En það er ekki alveg komið á áætlun hjá okkur strax.“

Alls áformar Landsvirkjun í ár að verja 29 milljörðum króna til framkvæmda en bjóða út verk fyrir 70 milljarða króna. 

En stóra spurningin er hvort fyrirtækinu takist að setja framkvæmdir við Hvammsvirkjun á fullt.

„Ég er bara full bjartsýni, ég sé enga ástæðu fyrir annað.“

-Ekki fleiri kærumál?

„Það er ekki útilokað að það muni koma fleiri kærur fram. Það er nú svo sem bara eins og verið hefur,“ svarar Ásbjörg í frétt Sýnar sem sjá má hér: