Fyrstu þreifingar áramótaveðurspár

Birgir Örn Höskuldsson veðurfræðingur á Veðurstofu Íslands segir enn of mikla óvissu ríkja yfir veðrinu um áramótin og að almennt sé lítið hægt að segja af viti um veður sex daga fram í tíma.

Þó segi síðustu tvær keyrslur líkananna að það verði sæmilega milt framan af degi á gamlársdag en kólni þegar líður á kvöldið.

Kuldaskil ganga yfir í nótt en þó má búast við mildu veðri áfram að sögn Birgis. Þessi óvenjulegi jólahiti kveður og við tekur aðeins vanalegra, ef svo má að orði komast, desemberveður.

Hvergi sé mikilli úrkomu spáð né aftakaroki og almennt megi búast við rólegu veðri fram að áramótum.