Fær ýmist þumalinn eða löngu­töng vegna einkanú­mersins

Bandaríkjaforseti og ríkasti maður heims urðu perluvinir í kringum framboð Trump til forseta í fyrra. Það slitnaði nýlega upp úr því sambandi og þeir skipst á skotum á samfélagsmiðlum. Musk hefur sagst ætla að stofna sinn eigin stjórnmálaflokk og Trump ætlar að selja Teslu-bílinn sinn, en Musk er forstjóri bílaframleiðandans.

Pælir ekki mikið í vinslitunum

Vinslitin hafa þó ekki teljandi áhrif á manninn sem keyrir um götur landsins á Teslu úr smiðju Musk, með einkanúmerið Trump.

„Svefnlausar nætur bara,“ segir Björgvin Sævarsson, eigandi bílsins, kaldhæðnislega og hlær. 

„Menn eru ýmist ósáttir eða ánægðir. Það er bara gaman af hvoru tveggja.“

Fólk tekur vel í þetta?

„Menn eru ýmist ósáttir eða ánægðir. Það er bara gaman af hvoru tveggja. Við erum eins misjöfn eins og við erum mörg,“ segir Björgvin. 

Vantaði rétta bílinn

Björgvin rekur Kef Guesthouse og bílastæðafyrirtækið CarPark í Keflavík og sækir stundum ferðamenn á bílnum. Hann segir þá alla jafna hafa gaman af einkanúmerinu. Hann segist hafa átt réttinn á númerinu nokkuð lengi. 

„Ég náði því rétt fyrir forsetakosningarnar 2016, en mér fannst ég eiga bílinn til að setja þetta á. Það var ekki fyrr en ég eignaðist þennan sem mér fannst kominn tími til að flagga því,“ segir Björgvin. 

Ekki mikill stuðningsmaður Trump

Þrátt fyrir einkanúmerið segist Björgvin ekki sérstakur stuðningsmaður Trump.

„Ég er bara eins og vindurinn, fram og til baka. Ég hef verið vinstra megin, miðjunni og hægra megin. Verið hægra megin síðustu ár. En ég viðurkenni það fúslega að af því sem var í boði í kosningunum 2016 og í fyrra, ég hefði kosið Trump í bæði skiptin,“ segir Björgvin.

En þú myndir ekki segja að þú værir mikill Trump-stuðningsmaður?

„Ekki þannig, ég er bara að hafa gaman af þessu.“

Eins og mamma og pabbi hafi verið að skilja

En hvorum megin er Björgvin í þessum deilum Musk og Trump?

„Ég er mitt á milli bara,“ segir Björgvin og hlær dátt. 

Líður þér eins og mamma og pabbi hafi verið að skilja?

„Það er svolítið svoleiðis, ég er alveg brotinn,“ segir Björgvin og hlær enn hærra.