Sundgestir reknir inn vegna þruma og eldinga

„Það komu þrumur og eldingar bara núna rétt í þessu,“ sagði Ragnheiður Ólafsdóttir, vakstjóri í Salalaug, þegar fréttastofa hafði samband um korter yfir fjögur.

„Um leið og við sáum þetta skipuðum við fólki að fara inn í innlaugina öryggisins vegna,“ sagði hún. „Það var fólk sem var að kaupa sig inn, við endurgreiddum þeim bara og hinir eru bara allir í innilauginni.“

Laust eldingunni þá niður svona nálægt lauginni?

„Ég var stödd í afgreiðslunni þegar þetta var og við sáum eldinguna. Við viljum hafa okkar viðskiptavini örugga,“ sagði Ragnheiður.

Gestir Salalaugar munu því þurfa að bíða eftir því að veðrið róist þar til hægt er að senda fólk aftur út.

Þrumur og eldingar víðar um höfuðborgarsvæðið 

Fréttastofu hafa einnig borist ábendingar um þrumuveður víðar um höfuðborgarsvæðið.

Miklar þrumur og eldingar hafa verið í gamla Vesturbænum niðri við höfn. Þá hafa íbúar Kópavogs einnig orðið varir við veðrið og barst ábending frá íbúa í Hafnarfirðinum sem sagði hús sitt hafa nötrað vegna þrumanna. Fréttastofu barst jafnframt þetta myndband úr Garðabænum þar sem íbúar fundu vel fyrir þrumum.

Gular veðurviðvaranir eru í gildi á suðvestur- og vesturhorni landsins upp úr 16 í dag og fram eftir kvöldi.

Veðurstofan birti spá sína fyrir síðdegið um hálf fjögur í dag. Þar var spáð austan og suðaustan þrettán til tuttugu metrum á sekúndu með snjókomu eða slyddu, en síðar rigningu. Þar af væri hvassast syðst á landinu og hiti á bilinu núll til sjö gráður.

Á Facebook-síðu sundlauga í Reykjavík kemur fram að búast má við því að útisvæði í sundlaugum loki tímabundið ef nálægð sé við eldingar.

Fréttin hefur verið uppfærð.