Halla Tomas og „Gmmtnnnnm“

Morgunblaðið hefur fjallað um undirskrift forsetans og vakið athygli á því að hún skrifar undir Halla Tomas í tónleikaskrá á 75 ára afmælistónleikum Sinfóníuhljómsveitar Íslands á dögunum. 

Þau svör feng­ust frá for­seta­embætt­inu að Halla hefði notað um­rædda und­ir­skrift um ára­tuga­skeið og haldið henni óbreyttri eft­ir að hún tók við embætti for­seta.

Guðrún Kvar­an, sem auk starfa sinna við HÍ og Árna­stofn­un hef­ur til að mynda verið formaður Íslenskr­ar mál­nefnd­ar og formaður manna­nafna­nefnd­ar, furðar sig á at­hæfi for­seta Íslands í samtali við Morgunblaðið.

„Mér finnst mjög mik­il­vægt að Íslend­ing­ar skrifi nöfn sín á eðli­leg­an hátt. Þá á hún nú ekki að skamm­ast sín fyr­ir að vera dótt­ir ein­hvers, hún á bara að skrifa „Tóm­as­dótt­ir“,“ seg­ir Guðrún. 

Það sé engin réttlæting að svona hafi hún alltaf skrifað undir.

„Það er ekk­ert betra. Hún var mikið í er­lend­um sam­skipt­um og þá var kannski erfitt að hafa „dótt­ir“. En hún býr á Íslandi og er að skrifa und­ir ís­lenskt plagg. Þá á hún að skrifa und­ir „Halla Tóm­as­dótt­ir“ og ekk­ert annað.“

Umfjöllunin hefur vakið mikla athygli en Halla var búsett í Bandaríkjunum um árabil þar til hún flutti til Íslands eftir forsetakjörið. Dagur B. Eggertsson, þingmaður Samfylkingarinnar og fyrrverandi borgarstjóri, er meðal þeirra sem hefur stungið niður penna á Facebook. Hann gagnrýnir ekki forsetann heldur setur fréttaflutninginn í samhengi við undirskrift ritstjóra Morgunblaðsins, Davíðs Oddssonar.

„Ég fagna því gríðarlega að Morgunblaðið hafi rofið þögnina sem hefur ríkt um rithönd ráðamanna. Blaðið hefur greinilega ákveðið að byrja á okkar ágæta forseta Höllu Tómasdóttur. Mogga finnst hún alls ekki skrifa vel og vill að hún breyti undirritun sinni,“ segir Dagur og vísar til fréttarinnar í dag og í gær.

Hann óskar eftir því að fréttirnar af undirskrift Höllu verði upphafið að greinarflokki um þessi efni og beinir spjótum sínum að Davíð, fyrrverandi borgarstjóra, forsætisráðherra, seðlabankastjóra og nú ritstjóra Morgunblaðsins.

„Ég hef lengi þráð að fá skýringar á því hvers vegna ritstjóri blaðsins skrifar alltaf undir með einhverju sem líkist “Gmmtnnnnm” en alls ekki Davið Odsson eins og víða má sjá í opinberum skjölum. Hér er dæmi af fyrsta Icesave-samningnum sem ritstjórinn skrifaði undir með Árna Matthiesen þáverandi fjármálaráðherra haustið 2008. MÁ ÞETTA BARA????“ spyr Dagur og birtir skjáskot.