Ekki verði hróflað við kvóta­kerfinu

Formenn stjórnarflokkana hafi verið andvígir frumvarpi Katrínar Jakobsdóttur um ákvæði í stjórnarskrá um auðlindir í þjóðareign vegna þess það hafi ekki kveðið á um að allir samningar sem gerðir verði væru tímabundnir. Tekið er sérstaklega fram í stjórnarsáttmála nýrrar ríkisstjórnar að hún hyggist koma slíku ákvæði í stjórnarskrána með eftirfarandi orðalagi: „Ríkisstjórnin mun hafa forgöngu um að samþykkt verði ákvæði í stjórnarskrá um auðlindir í þjóðareign.“ 

Formennirnir tókust á um sjávarútvegsmálin í Kryddsíld.

„Ef þetta er nýja stefnan þá þarf að semja nýtt sjávarútvegiskerfi,“ sagði Bjarni.

Þorgerður Katrín utanríkisráðherra sagði hins vegar kýrskýrt að ríkisstjórnin ætli ekki að hrófla við kvótakerfinu.

„Svaraðu spurningunni. Verður stjórnarskráratkvæðið með skilyrði um að ríkið geri aldrei samninga um aðgang að auðlindum í sameiginlegri eigu nema samningarnir verði tímabundnir? Þetta er ástæðan fyrir því að þið vilduð ekki ákvæðið hennar Katrínar,“ spurði Bjarni þá.

Bjarni krefur ríkisstjórn um svör

Kristrún Frostadóttir forsætisráðherra sagði nýja ríkisstjórn þurfa tíma til að koma sér fyrir í sínum ráðuneytum. Sjávarútvegsmálin hafi þó verið rædd í þaula formannanna á milli þó ekki séu tekin fram smáatriði um orðalag auðlindaákvæðis í stjórnarsáttmála ríkisstjórnarinnar.

„Liggur ekki alveg fyrir að það eigi eftir að koma þingmálaskrá, alveg eins og formaður Framsóknar segir? Viljiði ekki bara hleypa okkur af stað? Það verður nægur tími fyrir svona gagnrýni og við hræðumst hana ekki,“ sagði Kristrún.

„Það er munur á því að vera með þrjá formenn saman sem eru með sameiginlegt traust sín á milli og vita að það þarf ekki að skrifa allt niður í minnstu smáatriði til að binda allt niður,“ sagði hún.

Bjarni Benediktsson gaf ekki mikið fyrir svör Kristrúnar og Þorgerðar Katrínar og krafði þau enn og aftur um svör varðandi orðalag ákvæðisins. Formenn stjórnarflokkanna hafi lagst á móti frumvarpi Katrínar Jakobsdóttur, fyrrverandi forsætisráðherra, vegna þess að það hafi skort skýrt ákvæði um stjórnarskrárbindingu tímabundinna samninga.

„Ég lýsti yfir stuðningi við það ákvæði. Þau voru á móti því ákvæði af því að það stóð ekki í ákvæðinu að það þyrfti að gera tímabundinn samning alltaf. Þá segja þau: „Við ætlum að koma með ákvæði!“ Ég spyr bara þessarar spurningar: Mun vera gerður áskilnaður um tímabundna samninga? Og þau geta ekki svarað því,“ sagði Bjarni.

„Allt einhverjir frasar“

Sigmundur Davíð Gunnlaugsson, formaður Miðflokksins sagði þá ósamræmis hafa gætt í málflutningi ríkisstjórnarinnar. Þorgerður Katrín segi að ekki verði hróflað við kvótakerfinu en Inga Sæland og Kristrún boði stórtækar breytingar.

„Við skulum aðeins koma okkur niður á jörðina og átta okkur á hvað við erum að tala hérna um. Þessi ríkisstjórn er búin að sameinast um það að til dæmis hækka veiðigjöld í sjávarútvegi, koma á auðlindagjöldum sem snúa að feðraþjónustu, fara í sanngjarnari dreifingu á orkunni og gjöldum sem mögulega er hægt að taka af því þannig að það verði ákveðin hvati í nærsamfélögum til að fá orku til sín,“ svaraði Kristrún honum.

„Þetta eru allt einhverjir frasar. Hver styður ósanngjörn veiðigjöld?“ spurði Sigmundur þá.

„Auðlindarentan hefur verið metin á 50, 60, 70 milljarða í sjávarútvegi. Í fyrra voru veiðigjöld tekin sem hljóma upp á tíu milljónir. Það liggur alveg fyrir að það er vilji í samfélaginu til þess að ákveðnar auðlindagreinar greiði hluta af rentunni til baka. Þetta snýst ekki um að refsa einum né neinum. Það eru réttindi og skyldur sem felast í að búa í samfélagi,“ segir Kristrún Frostadóttir forsætisráðherra.

Hér að neðan má sjá Kryddsíld í heild sinni.