Leggja til allt að níu­tíu milljónir í bar­áttunni við hjólreiðaþjófnað í Reykja­vík

Hópurinn skilaði skýrslu um tillögur sínar að aðgerðum til umhverfis- og skipulagsráðs Reykjavíkurborgar í gær. Í tilkynningu á vef borgarinnar segir að næstu skref sé að rýna betur í þær aðgerðir sem lagðar eru til

Fram kemur að í vinnu sinni hafi hópurinn skoðað hjólaþjófnað út frá ýmsum hliðum. Til að mynda hvar helst væri hægt að grípa til aðgerða, og þá er hópurinn sagður hafa greint fjölda þjófnaða eftir hverfum og bótagreiðslum tryggingafyrirtækja eftir árum.

Jafnframt var skoðað hvaða aðgerða hafi verið gripið til í öðrum löndum.

Aðgerðirnar níu sem starfshópurinn leggur til eru eftirfarandi:

• Hjólaskýli við íbúðarhúsnæði þar sem ekki eru hjólageymslur
• Uppsetning og rekstur á hjólaskápum í miðborginni, fyrir þá sem ekki eiga möguleika á að geyma hjól í geymslum heima hjá sér vegna plássleysis.
• Fjölgun hjólastæða við stofnanir og fyrirtæki borgarinnar
• Upplýsingaherferð um rétta notkun á lásum og mikilvægi þeirra til að sporna við þjófnaði.
• Vátryggingafélög auki forvarnarfræðslu sína. Upplýsi sína viðskiptavini markvisst um hættur og leiðir til þess að draga úr hættu á þjófnaði.
• Hjólreiðaskrá.
• Aðstaða til hjólageymslu hjá heimilislausum og þeim sem eiga við fíknivanda að ræða með því að leggja þeim til hjól að kostnaðarlausu.
• Eftirlit Tollstjóra með útflutningi á gámum sem innihaldið geta hjól sem flutt eru úr landi.
• Reiðhjólaverslanir í samstarfi við aðra aðila skrásetji hjól í gagnagrunn strax við kaup.

Fram kemur að ekki sé um að ræða tæmandi lista aðgerða eða verkefna sem þessar aðgerðir gætu leitt af sér í framhaldinu.

Starfshópurinn var að störfum frá nóvember fram í miðjan desember 2023 og fékk til samtals fulltrúa frá níu hagaðilum.

„Með samræðum við hagsmunaaðila hefur orðið til vettvangur tengslamyndunar hjá fulltrúum sem sjá sér hag í því að vinna betur saman að hvers kyns verkefnum sem geta hjálpað til við að draga úr hjólaþjófnaði,“ segir í tilkynningunni.

Hagaðilarnir voru eftirfarnadi:

• VoR-teymi Reykjavíkurborgar (Vettvangs- og ráðgjafateymi (VoR) aðstoðar fólk sem er heimilislaust og með vímuefnavanda og geðvanda)
• Reidhjolaskra.is
• Reiðhjólaverslanir
• LHM / Reiðhjólabændur
• Tollstjóri
• Neytendasamtökin
• Lögreglan á höfuðborgarsvæðinu
• Tryggingafélög
• Samgöngustofa