„Þetta er upp­lifun lífsins!“

Kristján Már Unnarsson, fréttamaður Stöðvar 2, er staddur ásamt Einari Árnasyni tökumanni á hæð rétt fyrir ofan Njarðvík þar sem vel sést til gosstöðvanna. Þar hitti hann hóp ferðamanna, ljósmyndara, sem staddir voru á hóteli Bláa lónsins í nótt.

„Við vöknuðum við viðvörunarflautur, pökkuðum dótinu okkar og fórum út á bílastæði. Þá sáum við eldgosið. Þetta var magnað, frábært. Þetta er eitthvað sem maður upplifir einu sinni á ævinni,“ sagði Chris, einn úr hópnum.

Hann segir starfsfólk hótelsins hafa verið rólegt og yfirvegað.

„Við treystum því að við værum í öruggum höndum. Þau komu og bönkuðu á herbergisdyrnar í rólegheitunum og sögðu okkur að við þyrftum að rýma svæðið. Allir voru mjög rólegir og skipulagðir.“

Vonuðust eftir gosi

Einn úr hópum sagðist hafa vaknað við jarðskjálftana og grunað hvað væri í vændum. 

„Mér fannst þetta grunsamlegt, við fengum smá fyrirvara.“

Voruð þið jafnvel að vonast til að það færi að gjósa?

„Ekki spurning!“

 Einhverjir úr hópnum eiga farmiða frá landinu í dag en íhuga nú að lengja ferðina vegna eldgossins.

„Við höfum séð ís, norðurljós og nú þetta. Við biðjum fyrir öryggi allra, að bærinn (Grindavík) verði ekki fyrir frekari skemmdum og að Bláa lónið sleppi. En það er magnað að sjá þetta úr fjarlægð.“

Þetta er upplifun lífsins! Ísland stendur alltaf fyrir sínu.