Þakk­lát að varúðarsjónarmið hafi verið höfð að leiðar­ljósi

„Fyrst þykir mér mikilvægt að ítreka hversu mikilvægt það hefur verið að beita hér varúðarsjónarmiðum, öryggissjónarmiðjum. Rýmingin stendur enn, ég þakkaði fyrir það í gærkvöldi þegar ég fekk þessar fréttir því þetta var mjög stuttur aðdragandi að mjög stóru gosi,“ segir Katrín. 

Ríkisstjórnin fylgist grannt með, enda er sprungan mjög nálægt byggðinni í Grindavík. 

„Enn sem komið er virðist hraunstreymið vera í þá átt að það ógni ekki innviðum í bráð. Þetta sýnir hversu mikilvægt það er að hafa þetta öfluga vísindafólk og viðbragðsaðila sem hafa verið vakin og sofin yfir þessari stöðu síðan í lok október.“

Fylgst grannt með innviðum

Augun séu annars vegar á Grindavíkurbæ og hins vegar orkuverinu í Svartsengi.

„Varnargarðurinn, sem ráðist var í, hann er á lokametrunum við Svartsengi. Það liggur fyrir tillaga eða hugmynd að varnargarði í Grindavík en það er ekki talið tímabært að ráðast í slíka framkvæmd. Við áttum fund um þetta í morgun með Veðurstofu, lögreglustjóra og almannavörnum. Það liggur fyrir að til eru hugmyndir um hvernig er hægt að ráðast í það en við erum bara að meta stöðuna áfram,“ segir Katrín. 

Þá sé verið að vakta Grindavíkurveg sérstaklega núna, enda yrði mikill skaði flæddi hraun yfir vegi. 

„Eins og við þekkjum þá geta náttúruöflin verið ansi ófyrirsjáanleg þrátt fyrir alla okkar vöktun og rannsóknir. Nú erum við að horfa á þetta út frá þeim líkönum sem vísindafólkið okkar hefur þróað til að spá fyrir um hraunrennslið. En á sama tíma og hraun rennur breytist landslag þannig að við verðum að fylgjast með nánast klukkustund frá klukkustund.“

Íbúðarmálin áfram stórt úrlausnarefni

Eins og fjallað hefur verið um hafa Grindvíkingar verið mjög óþreyjufullir að komast aftur heim eftir að bærinn var rýmdur 10. október síðastliðinn. Katrín segir óvissuna eiginlega hafa verið versta.

„Ég hef fundið það í samskiptum mínum við Grindvíkinga, sem hafa verið mikil allt frá rýmingu, að óvissan er erfið. Það var tekin stór ákvörðun um rýmingu, eðlilega var farinn að myndast þrýstingur um það að komast til baka fyrir jólin. En ég fylltist ákveðnu þakklæti í gærkvöldi þegar þessar fréttir bárust að varúðarsjónarmiðin hafi verið höfð að leiðarljósi. Auðvitað skildi ég mætavel óþreyjuna eftir að snúa heim en um leið var ég þakklát að varúðarsjónarmiðin voru höfð að leiðarljósi,“ segir Katrín. 

Eru einhverjar sérstakar ráðstafanir sem stjórnvöld þurfa að grípa til núna vegna þessa goss? 

„Við vorum auðvitað búin að grípa til ákveðinna ráðstafana hvað varðar bæði húsnæðisstuðning og launagreiðslur til Grindvíkinga vel fram yfir áramót. Það er mjög gott að þau mál séu öll komin í höfn. Það er verið að vinna áfram að öflun íbúðarhúsnæðis. Það er risastórt úrlausnarefni áfram fyrir stjórnvöld því þó að við höfum gengið þannig frá málum að nú eru heimildir til staðar til að festa kaup á íbúðum þá er þetta áfram vandi. Hafi fólk hugsað sér að hann væri að fara að leysast því það fengi að snúa heim þá liggur fyrir að svo sé ekki.“