Innlent

Leigufélag með methagnað krefur öryrkja um þriðjungs hækkun

Berghildur Erla Bernharðsdóttir skrifar
Brynja Bjarnadóttir segist vera á götunni eftir að Íbúðarfélag hækkaði við hana leigu um fjórðung. Það gefur henni tvo mánuði til að endurnýja eða flytja ella.
Brynja Bjarnadóttir segist vera á götunni eftir að Íbúðarfélag hækkaði við hana leigu um fjórðung. Það gefur henni tvo mánuði til að endurnýja eða flytja ella. Vísir/Ívar

Þrátt fyrir að Íbúðafélagið Alma hafi skilað 12,4 milljarða methagnaði á síðasta ári hækkar félagið leigu hjá sínu fólki um þriðjung eftir áramót. Öryrki segist ekki geta greitt leiguna og sér fram á að lenda á götunni.

Brynja Bjarnadóttir er öryrki og hefur búið í leiguíbúð í eigu Íbúðafélagsins Ölmu síðustu ár. 

Hún hefur greitt um 250 þúsund krónur í leigu á mánuði en fékk tilkynningu um mánaðamótin um að frá og með fyrsta febrúar hækki leigan í 325 þúsund krónur. Hún þurfi að endurnýja samninginn um áramót. 

Brynja vakti athygli á þessari stöðu á síðunni Öryrkjar á Facebook. 

„Ég vissi að ég þyrfti að endurnýja samninginn en ég vissi ekki að það yrði upp á sjötíu og fimm þúsund krónur til viðbótar,“ segir Brynja. 

Meiri hækkun en mánaðarlegt ráðstöfunarfé

Brynja segir að hækkunin sé meira en hún hafi milli handanna í ráðstöfunarfé. Öryrkjabætur dugi skammt.

„Ég fæ í kringum þrjú hundruð og tuttugu þúsund krónur á mánuði í bætur. Ég fæ líka húsnæðisbætur. Tvö hundruð og fimmtíu þúsund hafa farið í leigu og eftir að hafa greitt hana og aðrar skuldir hef ég haft um sextíu þúsund krónur til að lifa út mánuðinn. Þessi hækkun nú er því meiri en ég hef haft til að lifa af út mánuðinn og því útilokað að ég geti greitt þetta,“ segir Brynja.  

Hún segist því oft þurfa að leita á náðir hjálparstofnana og fjölskyldumeðlima með mat. Nú sé frystirinn t.d. nánast tómur og jólin að koma.  

Brynja segist enn ekki hafa fundið nýtt húsnæði en Íbúðafélagið Alma gefur henni mánuð til að endurnýja samninginn. Núverandi leigusamningur rennur svo út 31. janúar 2023. Aðspurð um hvort Alma hafi boðið henni ódýrari húsnæði svarar hún:

„Þeir eru ekki með neinar ódýrar íbúðir. Þeir hafa bent mér á eina íbúð í Borgarnesi.“

Hún segist hafa leitað fanga á fleiri stöðum. 

Ég er að bíða eftir svari frá Ásbrú á Suðurnesjum en hef ekki fengið.  Ég myndi þó  helst vilja vera í Reykjavík út af veikindunum hjá mér,“ svarar hún.

Alma græddi á þrettánda milljarð í fyrra

Íbúðafélagið Alma auglýsir sig sem traustan valkost á heimasíðu sinni. Þar kemur fram að félagið vinni markvisst að því að gera leigumarkaðinn á Íslandi faglegri, fjölskylduvænni og traustari. 

Félaginu gekk einstaklega vel í fyrra og skilaði methagnaði upp á tólf komma fjórða milljarða króna. 

Íbúðafélagið Alma skilaði methagnaði í fyrra.Vísir/Hjalti

Framkvæmdastjóri félagsins svaraði ekki skilaboðum fréttastofu í dag vegna málsins.


Tengdar fréttir

Kallar eftir neyðarlögum um leigufélög og myndarlegri aðkomu ríkisins

Formaður VR segir að það muni líklega ekki taka lengri tíma en daginn í dag til að meta hvort flötur sé á samningi við Samtök atvinnulífsins. Hann segir gríðarlega mikilvægt að ríkisstjórnin liðki fyrir viðræðum og helst með neyðarlögum um leigufélög. Staða til dæmis leigjenda og fólks með húsnæðislán með breytilegum vöxtum sé alvarlegri en svo að kjarasamningar einir og sér dugi til.

Leigu­fé­lag lækkar leiguna um þriðjung í desember

Leigufélagið Bríet hyggst veita leigjendum sínum 30 prósenta afslátt af leigu nú í desembermánuði. Leigutökum var tilkynnt þetta bréfleiðis í morgun og ættu þeir að sjá lægri upphæðir en vanalega á greiðsluseðlum í heimabankanum sínum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.