Ó­vissa um hjól­hýsa­svæðið í Laugar­dal sé kvíða­valdandi

Sanna Magdalena Mörtudóttir, borgarfulltrúi Sósíalistaflokksins, segir gott samfélag hafa myndast í Laugardalnum þar sem tólf búa í hjólhýsum eða húsbýlum allan ársins hring. Hún ræddi málið í Bítinu á Bylgjunni í morgun.

„Þau hafa kosið að þessa búsetu og vilja vera í þessu búsetuformi og eru einmitt að ítreka það að það verði fundin langtímalausn til þess að það sé ekki þessi óvissa um framtíðina,“ segir Sanna Magdalena.

Fyrirkomulagið undanfarin ár hafi verið þannig að leigusamningar hafa verið gerðir við íbúa með skamman gildistíma. „Þetta er alltaf gríðarlega mikil óvissa, að vita ekki hvort þú getir verið með heimili þitt þarna til lengdar. Af því þetta er náttúrulega heimili fólks,“ segir Sanna Magdalena.

Lengi talað um að finna þurfi langtímalausn

Sanna Magdalena segir að lengi hafi verið talað um að finna þurfi varanlega lausn, í því samhengi hafi verið talað um Laugardalinn en einnig önnur svæði.

„En svo einhvern veginn gerist ekki neitt. Það er svona mikið verið að tala og verið að funda og verið að tala um að þurfi að finna langtímalausn en svo kemur ekki lausn,“ segir hún.

Hún segir að hún upplifi vandamálið sem svo að svið borgarinnar tali ekki saman sem og að borgaryfirvöld hafi talið í gegnum tíðina að um tímabundið búsetuúrræði væri að ræða. Því þyrfti ekki að finna langtímalausn. „Það þarf náttúrulega að skipuleggja þetta,“ segir Sanna Magdalena.

Kostnaður upp á sextíu til eitt hundrað milljónir króna

Sanna Magdalena segir Sósíalista hafa sent fyrirspurn um hvernig gangi að skipuleggja svæðið til langs tíma eða jafnvel finna hjólhýsunum varanlegan stað annars staðar. Í svari borgarinnar hafi komið fram að kostnaður myndi hlaupa á sextíu til hundrað milljónum króna. Huga þyrfti að umhverfi og innviðum.

„Þannig að þetta er ekkert mál, það þarf bara að framkvæma,“ segir hún.

Íbúar á svæðinu greiða leigu fyrir að nota stæðin og aðstöðu sem þar er að finna. Leigan hefur verið á bilinu þrjátíu til 45 þúsund krónur á mánuði.

Íbúar vilja ekki færa sig

Íbúar sem Sanna Magdalena hefur rætt við segja að Laugardalurinn henti vel fyrir hjólhýsabyggðina, þar sé stutt í þjónustu og samgöngur góðar. Aðrar staðsetningar gætu hentað íbúum en þeir leggji áherslu á að byggðin sé í nálægð við þjónustu.

„Það gengur náttúrulega alls ekki að þetta sé ekki nálægt samgöngum, að þetta sé í margra kílómetra fjarlægð frá þjónustu af því það geta ekki allir verið lengst í burtu. Það er það sem íbúarnir leggja áherslu á,“ segir hún.

Þá leggja íbúar einnig áherslu á að óvissu um framtíð svæðisins ljúki og það verði skipulagt sem íbúðarsvæði svo þeir geti skráð lögheimili sín þar. „Af því þú getur ekki gert það núna, þú færð ekki póst,“ segir Sanna Magdalena.