Segir vinnubrögð Vegagerðarinnar kosta bílaleigur milljarða

Tryggvi Páll Tryggvason skrifar 30. júní 2022 10:35

Samtök ferðaþjónustunnar vilja að Vegagerðin hætti blettaviðgerðum á vegum landsins með slitlagi. Vísir/Friðrik Þór

Formaður bílaleigunefndar Samtaka ferðaþjónustunnar segir að sprenging hafi orðið á framrúðutjóni eftir að Vegagerðin jók blettaviðgerðir með slitlagi. Bílaleigur meta tjónið sitt á um 2,5 milljarða árlega. Samtökin krefjast þess að stjórnvöld banni blettaviðgerðir með slitlagi.

Þetta kemur fram í grein sem Hendrik Berndsen, formaður bílaleigunefndar SAF, skrifaði á Vísi á morgun.

Þar vísar hann í að slitlagsviðgerðir á vegum landsins eru framkvæmdar með þeim hætti að harpaðri möl er dreift yfir olíu sem ökumenn og umferð eru látin vinna við að þjappa slitlagið niður.

Þessu fylgi steinkast sem Hendrik segir að baki bílaleigum og öðrum bílaeigendum mikið tjón.

„Rúðusprungur og rúðubrot eru langviðamestu og dýrustu tjónin sem steinkast veldur, og hafa orðið enn kostnaðarsamari í seinni tíð þar sem öryggistækni bifreiða liggur að stórum hluta í framrúðunni,“ skrifar Hendrik.

Tjón á bílum í eigu bílaleiga er sagt vera mikið á ári hverju vegna framrúðutjónsVísir/Vilhelm

Þá segir hann að sprenging hafi orðið í framrúðutjónum vegna steinkasts eftir að Vegagerðin hafi aukið blettaviðgerðir með slitlagi fyrir nokkrum árum.

„Fjárhæð framrúðutjóna á Íslandi hleypur á milljörðum árlega en samkvæmt mati tveggja bílaleiga er áætlað að tjónin nemi rúmum fjórum milljörðum árlega, þar af er tjón bílaleiga um 2,5 milljarðar,“ skrifar Hendrik.

Segir hann að Samtök ferðaþjónustunnar og bílaleigunefnd samtakanna hafi átt í viðræðum við Vegagerðina um nokkurt skeið um að breyta verkferlum við slitlagsviðgerðirnar.

„[E]n því miður hefur lítið orðið ágengt og aðeins kornastærð malar hefur verið breytt. Þannig hafa samtökin einnig bent á að völtun og sópun gæti bjargað heilmiklu auk aukinna merkinga sem boða lækkaðan hraða en þessum þáttum er enn ábótavant.“

Krefjast samtökin að stjórnvöld geri breytingar á verkferlum Vegagerðarinnar og banni blettaviðgerðir með slitlagi.

„Samtök ferðaþjónustunnar og bílaleigunefnd SAF fara fram á það við stjórnvöld að gera breytingar á verkferlum við slitlagsviðgerðir t.d. að nota ljósastýringu þegar ný klæðning er lögð og efla merkingar. Samtökin telja að banna ætti alfarið blettaviðgerðir með slitlagi þar sem umferð er sett í vinnu við að þjappa mölina. Frekar ætti að setja skilyrði um völtun og sópun og hægja á umferð fram hjá svæðinu á meðan viðhald á sér stað. Þannig er m.a. stuðlað að færri slysum, færri framrúðutjónum og auknu öryggi í umferðinni sem á endanum leiðir til aukinnar hagkvæmni.“

Samgöngur Bílaleigur Ferðamennska á Íslandi

Tengdar fréttir

Malarköflum fækkar um tvo á hringleiðinni um Vestfirði

Fyrsti kaflinn á Dynjandisheiði sem lagður er bundnu slitlagi var opnaður umferð um helgina og hefur malarköflum á Vestfjarðahringnum núna fækkað um átta kílómetra.

27. júní 2022 23:22

Klæðning lögð um Pennudal áleiðis upp á Dynjandisheiði

Klæðningarflokkur frá Borgarverki, undirverktaka ÍAV, hóf í morgun að leggja fyrri umferð bundins slitlags á kafla Vestfjarðavegar um Pennudal, eða Penningsdal, ofan Flókalundar í Vatnsfirði. Þetta er vegarkafli sem opnaður var umferð í nóvember en ekki náðist þá að klæða hann fyrir veturinn vegna óhagstæðs veðurs.

14. júní 2022 15:40

Holskefla tilkynninga út af holum: 57 tjón á aðeins fjórum dögum

Holskefla tilkynninga hefur borist Vegagerðinni síðustu daga vegna skemmda á bílum sem eigendur rekja til ástands vega. Vegagerðarmenn hafa vart undan að fylla upp í holur sem myndast hafa eftir slæma tíð síðustu vikur.

3. mars 2022 23:31

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.