Lífið

Höfðu ekki hug­mynd um Strætó á Kefla­víkur­flug­velli

Ólafur Björn Sverrisson skrifar
Ferðamenn streyma nú til landsins í stórum stíl. Margir ætla sér að ferðast vítt og breytt um landið en færri vita af almenningssamgöngum hér á landi.
Ferðamenn streyma nú til landsins í stórum stíl. Margir ætla sér að ferðast vítt og breytt um landið en færri vita af almenningssamgöngum hér á landi. Vísir/Vilhelm

Flestir þeirra ferðamanna sem Vísir ræddi við á Keflavíkurflugvelli í vikunni virtust ekki hafa hugmynd um að til staðar væru almenningssamgöngur að nafni Strætó sem gæti ferjað þau til höfuðborgarinnar. Flest voru búin undir hátt verðlag og sumir vissu vel af veðursviptingum hérlendis og voru tilbúin í sumar af eintómri rigningu.

Lærir tungumál þess lands sem vinnur Eurovision

Louise er forfallinn Eurovision aðdáandi og segist hafa tekið það upp hjá sér að læra tungumál þess lands sem sigrar Eurovision á hverju ári. Eins og allir vita átti Ísland að sigra keppnina 2020, þegar Daði Freyr var efstur í veðbönkum áður keppnin var blásin af vegna veirunnar. Hún hefur því reynt eins og hún getur að ná tökum á íslenskunni fram að ferðalaginu hingað til lands og mun eyða næstu viku í Reykjavík.

Varðandi samgöngur sagðist Louise meðvituð um Strætó.

„Ég gat samt hvergi séð hvar hægt væri að ná einum slíkum. Ég leitaði á Google earth í gærkvöldi áður en ég lagði í hann en sá hvergi stoppustöð þannig ég gafst upp á því og keypti mér bara miða í flugrútuna.“

Hún segist myndu taka Strætó jafnvel þótt hann tæki sér lengri tíma í að koma sér á leiðarenda.

„Það er væntanlega ódýrara og sennilega áhugaverðara að fá kynnast almenningssamgöngum frekar en að taka bara sérstaka túristarútu."

 „Ef það voru einhverjar merkingar fyrir Strætó þá sá ég þær að minnsta kosti ekki“ sagði Louise jafnframt.

„Það skrýtna var að í flugvélinni kom tilkynning um að ef fólk vildi kaupa rútumiða til borgarinnar væri það hægt hjá flugfreyjum og þjónum. Þegar þau komu virtust þau samt reyna að bægja mér frá því að kaupa miða af þessum fyrirtækjum.“

Louise mun eyða næstu dögum í Reykjavík til að kynnast menningu og máli landsins.Vísir/Vilhelm

Hún er ein á ferð og ætlar að kynnast íslenskri menningu og tungumálinu, eins og áður sagði. Hún starfar sjálf í vísindageiranum en tungumál eru hennar ær og kýr. Hún talar frönsku þar sem hún var búsett í Frakklandi um árabil, en einnig talar hún hollensku og ítölsku. Á síðasta ári hóf hún svo að læra íslensku og nú er hún komin stutt á leið með úkraínsku. Að lokum kvaddi Louise fréttamann á okkar ástkæra, ylhýra og sagðist halda nú til Reykjavíkur.

Leiðsögumaður sem fann engar leiðbeiningar

Lisa kom til Íslands til að leiðsegja ferðamönnum í hvalaskoðunarferðum. Hún hefur áður búið á Íslandi en segist ekki hafa náð almennilegum tökum á erfiðri íslenskunni, enn sem komið er.

Hún hefur ýmist leigt bíl eða tekið flugrútuna á leið sinni til Reykjavíkur og um landið.

„26 evrur fyrir staka rútuferð er svolítið mikið og ég held að það sé engin almennileg samkeppni, það er vandamálið,“ sagði Lisa.

Lisa mun leiðsegja ferðamönnum á Íslandi.Vísir/Vilhelm

Hún hafði enga hugmynd um Strætóstoppustöðina á Kjóavelli.

„Í hreinskilni sagt hefði ég haldið að strætóferð til Reykjavíkur, hvar sem það nú væri, myndi taka heila eilífð. Mörg óþörf stopp og sennilega strjálar ferðir.“

Aukinheldur segist hún ekki hafa séð neinar merkingar um Strætó á vellinum.

Varðandi verðlagið segist Lisa hafa skilning á því þar sem launin séu almennt hærri. „Maturinn er fáránlega dýr, en þetta er kannski ekki svo einstrengingslegt þar sem laun, skattar og önnur gjöld spila inn í en húsnæði er líka sturlað.“

Lisa er mjög hrifin af hálendinu en tekur fram að veðrið valdi henni oft vonbrigðum og hún sé núna tilbúin í heilt sumar af eintómri rigningu.

„Veit það ekki, ég var bara að mæta“

Eli og Harriet komu frá Pamplona á norður Spáni. Þau sögðust ekki hafa kynnt sér almennilega ferðamöguleika til Reykjavíkur, eða um landið almennt en tóku flugrútuna þar sem hún lá beinast við.

Eli og Harriet munu vinna við húshjálp í sumar.Vísir/Vilhelm

„Miðað við Spán þá er þetta strax dýrara. Við vorum samt búin undir þetta verðlag“ sagði parið sem mun starfa við húshjálp næstu mánuði og ferðast um landið – svo lengi sem það mun endast.

Lengi ætlað að koma

Paul og Vanessa komu frá Bournemouth í Englandi. Þau eru að heimsækja Ísland í fyrsta sinn en höfðu lengi haft í hyggju að koma hingað. Þau höfðu kynnt sér ferðamöguleika gaumgæfilega fyrir komuna.

„Verðið er auðvitað svolítið sjokk en við höfðum samt heyrt af því. Verðið, veðrið og náttúran er það sem fólk hefur nefnt við okkur sem hefur heimsótt Ísland."

Vanessa og Paul sögðust hafa lengi ætlað sér að heimsækja landið.Vísir/Vilhelm

Þau ætla sér að njóta nætursólarinnar og munu fara í nokkrar skipulagðar ferðir. Jöklarnir og fossarnir eiga síðan hug þeirra allan.


Tengdar fréttir






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.