Burðardýr í hálfs árs fangelsi fyrir kókaíninnflutning

Atli Ísleifsson skrifar 15. mars 2022 11:24

Konan var stöðvuð í tollinum á Keflavíkurflugvelli í mars 2020. Hún var þá að koma með flugi frá París í Frakklandi. Myndin er úr safni. Vísir/Vilhelm

Héraðsdómur Reykjaness hefur dæmt konu á fertugsaldri í hálfs árs fangelsi fyrir að hafa reynt að smygla rúmlega 300 grömmum af kókaíni í flugi frá París til Íslands í mars 2020. Konan flutti efnin í sjö pakkningum sem hún faldi innvortis.

Í dómnum kemur fram að konan hafi verið stöðvuð í grænu tollhliði í komusal flugstöðvar Leifs Eiríkssonar.

Konan játaði brot sín skýlaust en í dómnum segir að sannað konan hafi verið þarna í hlutverki svokallaðs burðardýrs. Hún hafi ekki verið eigandi fíkniefnanna eða tekið þátt í skipulagningu á kaupum og innflutningi þeirra til Íslands með öðrum hætti en þeim að samþykkja að flytja efnin til landsins gegn greiðslu.

Ennfremur segir að við ákvörðun refsingar hafi verið litið til greiðrar játningar konunnar bæði hjá lögreglu og fyrir dómi. Þá verði ekki framhjá því horft að ákærða hafi gert sér far um að upplýsa málið og veitt lögreglu mikilvægar upplýsingar um samverkamenn hér á landi. Þykir sex mánaða fangelsi hæfileg refsing, en til frádráttar kemur óslitið gæsluvarðhald sem konan hafi þurft að sæta frá miðjum janúar síðastliðinn.

Konan var jafnframt gert að greiða 2,2 milljónir króna í sakarkostnað.

Dómsmál Fíkniefnabrot Smygl Tollgæslan Keflavíkurflugvöllur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.