Innlent

Hættir í stjórn Samtaka um líkamsvirðingu sökum álags

Kolbeinn Tumi Daðason skrifar
Tara Margrét Vilhjálmsdóttir kveður Samtök um líkamsvirðingu eftir tíu ára stjórnarsetu. Hún ætlar þó að halda áfram að tala fyrir líkamsvirðingu og gegn fitufordómum.
Tara Margrét Vilhjálmsdóttir kveður Samtök um líkamsvirðingu eftir tíu ára stjórnarsetu. Hún ætlar þó að halda áfram að tala fyrir líkamsvirðingu og gegn fitufordómum. Vísir/Sigurjón

Tara Margrét Vilhjálmsdóttir sér sig knúna til að segja sig frá stjórnarstörfum hjá Samtökum um líkamsvirðingu. Hún segir ákvörðunina afar erfiða en þurfi að hlusta á þau merki sem líkaminn gefi henni um örmögnun og kulun, og hlýða þeim.

Þetta kemur fram í færslu Töru Margrétar á Facebook. Samtökin voru stofnuð í mars 2012 og hefur Tara Margrét setið í stjórn frá upphafi. Hún hefur verið áberandi og talað fyrir líkamsvirðingu og gegn fitufordómum. Hún segist ætla að gera það áfram.

„Þið losnið ekki svo auðveldlega við mig,“ segir hún á léttum nótum.

„Þetta er ein erfiðasta ákvörðun sem ég hef tekið en ég finn að ég þarf að gera það fyrir eigin heilsu og velferð. Stjórnarstörfin hafa verið gefandi og stórkostleg en þau hafa líka tekið mikið frá mér og ég er að lenda harkalega á vegg núna. Ég finn mig knúna til að hlusta á þau merki sem líkaminn gefur mér um örmögnun og kulnun og hlýða þeim.“

Tara Margrét segir mikla hugsjón og kraft í líkamsvirðingarsamfélaginu á Íslandi og það kristallist í núverandi stjórn samtakanna.

„Ég er ótrúlega spennt að fylgjast með og klappa fyrir áframhaldandi stjórn og störfum þeirra í framtíðinni.“

Hún útilokar ekki að snúa aftur til stjórnarstarfa þegar hún hafi náð meira jafnvægi og fyllt á tankinn.

„Framtíðin er enn óráðin. En fyrst ég er að taka mér þessa pásu langaði mig að nýta tækifærið og segja takk. Fyrir allt.“

Samtök um líkamsvirðingu voru stofnuð þann 13. mars 2012 með það að markmiði að stuðla að virðingu fyrir fjölbreytileika holdafars, jákvæðri líkamsmynd og heilsueflingu óháð holdafari.

Um samtökin

Samtök um líkamsvirðingu hafa það að markmiði að stuðla að virðingu fyrir fjölbreytileika holdafars, jákvæðri líkamsmynd og heilsueflingu óháð holdafari. Sömuleiðis munu samtökin gera sitt til að vinna gegn útlitsdýrkun og fitufordómum í samfélaginu. Það er von okkar að hér megi rísa öflug hreyfing gegn öllum þeim óheilbrigðu og jafnvel siðlausu áherslum sem virðast ríkja í tengslum við heilsu og holdafar í dag. Margt af því sem sett er fram í nafni heilsu á ekkert skylt við heilbrigði og fordómar og mannfyrirlitning virðast ráða ríkjum á mörgum sviðum. Við viljum búa til samfélag þar sem allir líkamar eru velkomnir og heilsuefling snýst um vellíðan og umhyggju fyrir líkamanum. Við viljum að börn læri að þykja vænt um líkama sinn og bera virðingu fyrir margbreytileikanum. Við viljum víkka út þröngsýnar hugmyndir um fegurð. Við viljum að fataverslanir bjóði föt fyrir raunverulegt fólk í allskonar stærðum. Við viljum ekki að neinn þurfi að forðast að fara í sund vegna líkamskomplexa. Við viljum binda endi á átraskanir, stríðni vegna holdafars og stríðið gegn offitu. Við viljum frelsi.

Tímamót

Tengdar fréttir

Offita og skaðaminnkun

Í gærkvöldi fór af stað fimmta þáttaröð fréttaskýringaþáttarins Kveiks og fjallaði fyrsti þátturinn meðal annars um offitu barna, með sérstakri áherslu á landsbyggðina. Þessi umræða skýtur upp kollinum með reglulegu millibili og er inntak hennar jafnan hversu „sláandi” og jafnvel „lamandi” tíðni offitu meðal íslenskra barna sé.

Mest lesið


Fleiri fréttir

Sjá meira


×

Mest lesið