Aurskriða féll á tvö hús í Varmahlíð

„Það féll skriða yfir Laugaveg og á tvö hús en það varð ekkert manntjón. Gatan er illa farin og það er verið að meta tjónið á húsunum. Þetta gerðist bara núna um miðjan daginn,“ segir Stefán Vagn í samtali við fréttastofu.

Hann segir hafa verið vel vitað að sprunga hafi verið komin í jarðveginn fyrir ofan veginn og höfðu verktakar verið fengnir til að vinna að því að tryggja sprunguna. Þeir voru á staðnum þegar skriðan féll.

„Það var komin sprunga í þennan jarðveg og komnir verktakar til að vinna í þessu. Þeir voru á staðnum þegar þetta gerist og við vissum að jarðvegurinn væri að gliðna í þessu barði, þeir voru komnir þarna með tæki til að létta á þessu þegar þetta gerist,“ segir Stefán Vagn.