Þórólfur hefur skilað minnisblaði til ráðherra

Sunna Kristín Hilmarsdóttir skrifar 15. mars 2021 07:59

Þórólfur Guðnason, sóttvarnalæknir, hefur skilað minnisblaði til heilbrigðisráðherra með tillögum að nýjum sóttvarnareglum. Vísir/Vilhelm

Þórólfur Guðnason, sóttvarnalæknir, hefur skilað tillögum að nýjum sóttvarnareglum til Svandísar Svavarsdóttur, heilbrigðisráðherra. Núverandi reglugerð gildir til og með 17. mars og nýjar reglur eiga því að taka gildi á fimmtudag.

Rætt var við Þórólf í Bítinu á Bylgjunni í morgun þar sem hann sagði frá því að hann hefði skilað inn nýju minnisblaði.

Hann vildi lítið að gefa upp um það hvað væri í tillögunum. Þó var frekar að heyra á honum að það væru ekki miklar tilslakanir í kortunum heldur væri frekar verið að skerpa á ákveðnum hlutum.

Þórólfur sagði tillögurnar auðvitað koma í ljósi þess sem gerðist í síðustu viku þegar það kom upp hópsýking sem samanstóð af sex manneskjum.

Smitin má rekja til einstaklings sem kom til landsins í lok febrúar og var með neikvætt PCR-próf við komuna til landsins. Þá greindist hann neikvæður í fyrri landamæraskimun og fór í sóttkví eins og reglur kveða á um.

Í seinni landamæraskimun greindist hann svo jákvæður og reyndist þá vera með breska afbrigði kórónuveirunnar sem er meira smitandi en önnur afbrigði.

Síðast greindist innanlandssmit þann 10. mars en fram kom í máli Þórólfs í Bítinu í morgun að tölur úr sýnatökum gærdagsins lægju ekki alveg staðfestar fyrir.

Þannig gætum við mögulega séð fleira fólk sem sett hefur verið í sóttkví vegna innanlandssmitanna undanfarna daga smitast.

„En ég vona að okkur hafi tekist að ná utan um þetta,“ sagði Þórólfur.

Hlusta má á viðtalið í heild sinni í spilaranum ofar í fréttinni.

Faraldur kórónuveiru (COVID-19) Samkomubann á Íslandi

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.