Innlent

Órói í tuttugu mínútur og stóru skjálftarnir fylgdu í kjöl­farið

Eiður Þór Árnason skrifar
Fjöldi skjálfta hafa mælst við Fagradalsfjall.
Fjöldi skjálfta hafa mælst við Fagradalsfjall. Vísir/vilhelm

Í gærkvöldi jókst jarðskjálftavirkni í Fagradalsfjalli umtalsvert og stóð sú aukna virkni yfir frá um klukkan 18 til 23. Um klukkan 00:22 hófst svo órói sem stóð yfir í um 20 mínútur. Í framhaldi af því jókst skjálftavirkni á Reykjanesi enn frekar og var mikil virkni í nótt með snörpum jarðskjálftum.

Stærsti skjálfti næturinnar var 5,0 að stærð klukkan 02:02 um þrjá kílómetra vestsuðvestur af Fagradalsfjalli. Ekki hafa fundist merki um gósóróa samkvæmt náttúruvársérfræðingum Veðurstofunnar. Skjálftavirknin hefur færst meira í átt að Grindavík en að sögn almannavarna og sérfræðinga Veðurstofunnar er líklegast að skjálftarnir þar séu afleiðingar spennubreytinga í jarðskorpunni en ekki vegna tilfærslu á kviku. Það er því ekki metið sem svo að þeir séu skammtímafyrirboði eldgoss.

Enginn órói hefur hefur mælst síðan um miðnætti. Púlsinn sem mældist þá var svipaður þeim sem mældist 3. mars en sá púls varði í nokkrar klukkustundir. Með óróa eða óróapúls er átt við mikinn fjölda skjálfta á stuttu tímabili sem erfitt er að greina á milli. 

Ekki útlit fyrir kviku fyrir norðan Grindavík

Þrjátíu jarðskjálftar um og yfir 3,0 að stærð hafa mælst frá miðnætti og þrír yfir 4,0 að stærð. Þar af hefur fjöldi skjálfta mælst við Grindavík og níu austan við Fagradalsfjall. Ekkert bendir til þess að stóru skjálftarnir rétt norðan við Grindavík tengist kvikuhreyfingum þar líkt og áður segir.

„Þetta eru skjálftar sem verða út af spennubreytingu, það er gangur sem er að þrýsta sér upp og þá eykst spennan í jarðskorpunni sem er þarna í kring og þá verða svona stórir skjálftar. Það er ekkert bendir til þess að kvika sé á hreyfingu nær Grindavík en við Fagradalsfjall,“ segir Salóme Jórunn Bernharðsdóttir, náttúruvársérfræðingur hjá Veðurstofu Íslands. Ekki sé útlit fyrir að nokkur kvika sé á svæðinu fyrir norðan Grindavík en áfram beri á kvikuhreyfingum undir Fagradalsfjalli.

Klukkan 7:22 mældist skjálfti að stærð 3,4 suðsuðaustur af Fagradalsfjalli og hafa minni skjálftar fylgt í kjölfarið. Alls hafa um 900 jarðskjálftar mælst hjá Fagradalsfjalli og vestur að Þorbirni frá miðnætti til klukkan sjö í morgun.

Könnuðu hvort skemmdir hafi orðið á vegum

Almannavarnadeild ríkislögreglustjóra og Veðurstofa Íslands funduðu ásamt lögreglunni á Suðurnesjum og fulltrúa Grindavíkurbæjar klukkan 03.30 í nótt vegna fjölda jarðskjálfta af stærðinni 3 til 5 á svæðinu frá Þorbirni að Fagradalsfjalli. Jarðskjálftarnir hafa fundist vel í Grindavík og má áfram búast við skjálftum sem finnast vel á svæðinu.  

„Náttúruvásérfræðingar Veðurstofunnar og Almannavarnadeild fylgjast vel með þróun mála í nótt. Vegagerðin og Lögreglan á Suðurnesjum eru á ferð og kanna hvort skemmdir hafi orðið á vegum. Staðan verður endurmetin í fyrramálið,“ segir í tilkynningu sem barst á fimmta tímanum í nótt. 

Að gefnu tilefni! Nú gengur yfir gríðarlega öflug skjálftahrina og ekki ólíklegt að hver einasti Grindvíkingur sé nú...

Posted by Björgunarsveitin Þorbjörn on Saturday, March 6, 2021

Björgunarsveitin Þorbjörn í Grindavík gaf út á fjórða tímanum í nótt að hún hafi hvorki verið kölluð út vegna skjálftanna né borist upplýsingar um að hætta væri á ferðum.

„Það er mjög eðlilegt að vera órólegur á meðan svona hrinur ganga yfir. Við viljum minna fólk á að ganga frá lausamunum og passa að taka dót niður úr hillum,“ segir í Facebook-færslu björgunarsveitarinnar þar sem andvaka íbúar Grindavíkur voru hvattir til að reyna að taka því rólega og horfa á góða mynd. 

Alls hafa yfir 22 þúsund skjálftar hafa verið staðsettir síðan öfluga jarðskjálftahrinan hófst á Reykjanesskaga þann 24. febrúar.

Fréttin hefur verið uppfærð.


Tengdar fréttir

Gætum séð fram á virknitímabil sem spannar árhundruð

Enn er full ástæða til að hafa gætur á vegna jarðhræringanna á Reykjanesi að sögn jarðeðlisfræðings. Skjálftavirkni sé enn mikil þrátt fyrir að fólk finn ef til vill minna fyrir skjálftum eins og staðan er núna. Það kunni að vera að framundan sé ákveðið virknitímabil á Reykjanesskaganum sem gæti spannað nokkur hundruð ára tímabil.

Ekki miklar líkur á eldgosi í núverandi ástandi

Engar vísbendingar eru um að kvika færist hratt nær yfirborði á Reykjanesskaga og telur vísindaráð almannavarna ekki miklar líkur á eldgosi á meðan það ástand varir. Jarðskjálfti upp á allt að 6,5 að stærð er talinn á meðal líklegustu sviðsmynda í jarðskjálftavirkninni á svæðinu.

Ný gögn stað­festa grun­semdir um að kvikan sé komin ansi ná­lægt yfir­borði

„Það sem þessir nýju líkanreikningar sýna okkur er að kvikan hefur náð ansi nálægt yfirborði í þessum kvikugangi og þetta er nánast lóðréttur kvikugangur sem liggur þarna á svæðinu milli Fagradalsfjalls og Keilis,“ segir Frey­steinn Sig­munds­son, jarðeðlis­fræðing­ur við Jarðvísindastofnun Háskóla Íslands. Líklegt er að kvikan hafi náð upp á allt að tveggja kílómetra dýpi í jarðskorpunni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×