Innlent

Barnaherbergi komið á Alþingi

Sunna Sæmundsdóttir skrifar
Hér má sjá nýtt herbergi fyrir foreldra og börn á Alþingi.
Hér má sjá nýtt herbergi fyrir foreldra og börn á Alþingi.

Barnaherbergi með skiptiaðstöðu hefur verið útbúið á fyrstu hæð þinghússins. Ragna Árnadóttir, skrifstofustjóri Alþingis, segir þetta gott skref í átt að því að gera Alþingi að fjölskylduvænni vinnustað.

Hún segir þetta gert til að mæta þörfum starfsfólks og þingmanna með lítil börn og nýbakaðra foreldra. „Þetta er liður í því að mæta þörfum fólksins hérna og bara sjálfsögð þróun,“ segir Ragna.

Þórhildur Sunna Ævarsdóttir, þingmaður Pírata, birti í dag myndir af herberginu, sem er á fyrstu hæð Alþingishússins, og hefur hlotið nafnið Hreiðrið.

Þar þakkar hún þingvörðum og starfsfólki Alþingis fyrir framtakið. „Ég hlakka til að hafa það huggulegt með unganum mínum í vinnunni en fyrst þarf ég víst að unga honum út,“ segir Þórhildur Sunna.

Mikið barnalán er í þingflokki Pírata en Þórhildur Sunna fór í fæðingarorlof í gær og á von á sínu fyrsta barni á næstunni. Halldóra Mogensen, einnig þingkona Pírata, átti dreng í nóvember og er nú í fæðingarorlofi.

Báðar stefna á framboð í kosningunum í haust og segir Þórhildur Sunna að herbergið muni því nýtast þeim vel þegar þær snúa aftur til vinnu.

Alþingi Börn og uppeldi Vinnumarkaður
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið