Óeirðir meðan þingmenn ræða sparnað

Tveggja daga allsherjarverkfall hófst í Grikklandi í gær og heldur áfram í dag, meðan þingmenn í Aþenu ræða um aðhaldsáform stjórnarinnar. Harðar óeirðir brutust út fyrir utan þinghúsið í gær, þar sem tugir þúsunda manna komu saman til að mótmæla skattahækkunum og sársaukafullum niðurskurði á ríkisútgjöldum.

Giorgios Papandreú forsætisráðherra reynir að tryggja stuðning þingsins við aðhaldsaðgerðir upp á 38 milljarða evra, en það samsvarar um 6.400 milljörðum króna.

Aðgerðapakkinn gerir ráð fyrir skattahækkunum upp á 14,1 milljarð evra og niðurskurði útgjalda upp á 14,3 milljarða, en að auki er stefnt að sölu ríkiseigna fyrir 50 milljarða á næstu fjórum árum.

Þingið þarf að samþykkja þennan sparnaðarpakka til að Grikkland fái næstu útborgun úr neyðarsjóði Evrópusambandsins, samtals 12 milljarða evra, sem stefnt er að að greiða út snemma í júlí.

Mikil andstaða er engu að síður við frumvarpið, bæði meðal þjóðarinnar og inni á þingi. Þótt sósíalistastjórn Papandreús hafi fengið samþykkta traustsyfirlýsingu á þingi í síðustu viku er andstaða við frumvarpið einnig mikil innan stjórnarflokksins PASOK.

Tveir þingmenn úr stjórnarliðinu hafa lýst því yfir að þeir ætli ekki að samþykkja frumvarpið, en stjórnin er með aðeins fimm þingmanna meirihluta þannig að mjótt er á mununum að það verði fellt.

Verkalýðsfélögin efndu til tveggja daga allsherjarverkfalls, sem hófst í gær en lýkur í dag, sama daginn og þingið hyggst afgreiða aðhaldsfrumvarpið.

Verkfallið hefur að nokkru lamað þjóðlíf í landinu. Almenningssamgöngur hafa legið nær alveg niðri og opinber þjónusta sömuleiðis.

Um tuttugu þúsund manns komu saman á Syntagmatorginu í Aþenu í gær til að efna til friðsamlegra mótmæla, en þau snerust fljótlega upp í óeirðir. Hópar grímuklæddra mótmælenda komu til leiks greinilega búnir undir átök, vopnaðir bareflum og jafnvel skjöldum.

Þeir brutu meðal annars rúður í verslunum, kveiktu í bílum og réðust sumir hverjir gegn lögreglunni.

gudsteinn@frettabladid.is