Viðbúnaður hugsanlega í áhættustig tvö

Hættulegt afbrigði fuglaflensunnar hefur fundist í villtum andfuglum í suðurhluta Svíþjóðar. Samkvæmt leiðbeiningum Landbúnaðarstofnunar um áhættustig þýðir þetta að viðbúnaður vegna flensunnar verði færður á stig tvö hér á landi. Veiran greindist í tveimur skúföndum við Oskarshamn.

Sænska landbúnaðarráðuneytið hefur ákveðið að grípa til víðtækra varnaraðgerðar á svæðinu og er að rannsaka hversu útbreitt smitið er. Greiningar sýna að um er að ræða hættulegt afbrigði fuglaflensuveirunnar, af sama tagi og hefur fundist í Rússlandi og Kína.

Fram til þessa hefur svonefnt áhættustig eitt verið í gildi hérlendis en þá er lítil hætta talin á að fuglaflensa berist til landsins. Í leiðbeiningum um áhættustigin frá embætti yfirdýralæknis segir að farið verði á áhættustig tvö ef fuglaflensa greinist á Bretlandseyjum eða í öðrum nágrannaríkjum. Fréttastofa hefur ekki náð í yfirdýralækni eða sóttvarnalækni enn.

I áhættustigi tvö felst að hýsa verður alla alifugla og tryggja að þeir sleppi ekki úr húsum. Þá þarf að þétta húsin tryggilega, og tryggja þvott og sótthreinsum við alla umgengni.