Kaupþing hvetur aðra miðla til að fjarlægja efni

Nýja Kaupþing og skilanefnd Kaupþings hvetja aðra fjölmiðla en RÚV til að virða lögbann sýslumanns og hætta tafarlaust fréttaflutningi sem byggist á yfirlitsglærum lánanefndar bankans og fjarlægja efni sem þegar hefur verið birt. Lögbanninu verði fylgt eftir gagnvart öðrum fjölmiðlum ef tilefni verður til.

Þetta kemur fram í yfirlýsingu sem bankinn sendi frá sér rétt í þessu.

Þar er fjallað um kröfu bankans um lögbann á fréttaflutning RÚV um skuldunauta bankans. Sagt er að lögbannið hafi fengist á þeim forsendum að um trúnaðarupplýsingar væri að ræða og birting þeirra væri í andstöðu við þagnarskylduákvæði laga um fjármálafyrirtæki.

Bankinn leggur áherslu á að með aðgerðunum séu bankarnir að bregðast við skyldum sínum til að tryggja trúnað við viðskiptavini sína, sem sé hornsteinn bankastarfsemi hvarvetna í heiminum. Markmiðið sé ekki að standa vörð um mögulegar misgjörðir í starfsemi bankans eða leyna upplýsingum sem erindi eiga til almennings.

Þá segir í yfirlýsingunni að bæði Nýja Kaupþing og skilanefnd Kaupþings hafi átt samstarf við rannsóknaraðila bankahrunsins um að upplýsa um orsakir og atvik í aðdraganda þess. Bankarnir munu ekki leggjast gegn því að hlutaðeigandi aðilar birti opinberlega þær upplýsingar sem aflað hefur verið og þeir telji að eigi erindi við almenning.

Yfirlýsingu Kaupþings má sjá í heild sinni hér að neðan.