Tvær handtökur til viðbótar í Danmörku

Tveir í viðbót hafa verið úrskurðaðir í varðhald í Danmörku grunaðir um þátttöku í skipulagningu hryðjuverkaárásar í Evrópu. Danska lögreglan útilokar ekki að hópurinn hafi ætlað að láta til skarar skríða í Danmörku.

Samkvæmt tilkynningu frá dönsku lögreglunni í morgun verða manneskjurnar tvær yfirheyrðar í dag, sakaðar um að hafa aðstoðað fjórmenninga, sem fyrir sitja í varðhaldi, við að skipuleggja hryðjuverkaárás. Ekki er greint frá kyni né aldri þessara tveggja, en tekið fram að tengsl þeirra við hina fjóra séu þess háttar að nauðsynlegt hafi verið að úrskurða fólkið í varðhald.

Upphaf málsins má rekja til rannsókar yfirvalda í borginni Sarajevó í Bosníu í síðustu viku, þar sem sænskur ríkisborgari og Tyrki voru handteknir. Tyrkinn er búsettur í Danmörku og danskir fjölmiðlar hafa eftir bosnísku dagblaði að Svíinn sé fæddur í múslimskum hluta Serbíu. Vitnað er í upplýsingar blaðsins Slobodna Bosna frá heimildum innan innan lögreglunnar þar í landi, sem segja mennina hafa tekið upp á myndband bænastund. Þar biðja þeir Allah um fyrirgefningu, þar sem þeir ætli sér að fremja sjálfsmorð sem sé synd samkvæmt Kóraninum. Um þrjátíu kíló af sprengiefni eru sögð hafa fundist í fórum mannanna í Bosníu.

Tengsl þeirra við hóp í Danmörku leiddu til aðgerða dönsku lögreglunnar á fimmtudag, sem handtók fjóra unga menn á aldrinum sextán til tuttugu ára í hýbýlum þeirra á Kaupmannahafnarsvæðinu. Tveir voru handteknir á heimili foreldra sinna í Brøndby, og segja nágrannar í viðtali við blaðið Politiken að drengirnir hafi virkað hinir rólegustu og síst hefði fólk grunað þá um að skipuleggja hryðjuverk.

Danska lögreglan ítrekar þó í tilkynningu í morgun eftir handtöku tveggja til viðbótar hér í Danmörku, að hvorki vopn né sprengiefni hafi fundist á heimili fólksins. Ekki er þó útilokað að hópurinn hafi verið að skipuleggja árás í Danmörku.