Trukkur keyrði á Jóhönnu Guðrúnu í miðbæ Moskvu

„Við vorum bara á leiðinni á japanskt veitingahús í miðbænum og ætluðum að fá okkur sushi. Þegar við vorum um það bil að stíga út úr bílnum kom bara einhver trukkur og keyrði aftan á okkur,“ segir María Björk, umboðsmaður Jóhönnu Guðrúnar, Eurovison-stjörnu Íslendinga.

Í bílnum voru auk Maríu og Jóhönnu, farar­stjóri og bílstjóri en allir sluppu ómeiddir frá atvikinu. Bílstjórinn umræddi stakk hins vegar af og hefur ekkert til hans spurst. María bætir því að þær stöllur hafi orðið að fá sér eitthvað gott í gogginn enda sé rússneskur matur ekki alveg eftir þeirra höfði.

Hins vegar hefur allt gengið að mestu leyti vel í þá fjóra daga sem Eurovision-föruneytið hefur dvalist í Moskvu. Jóhanna hefur vakið mikla athygli og bæði blaðamenn og ljósmyndarar eru áhugasamir um þennan unga söngfugl frá Íslandi. Einhverjir hnökrar eru hér og þar því samkvæmt þéttskipulagðri dagskrá liðsstjórans Jónatans Garðarssonar var gert ráð fyrir því að hópurinn gæti losað um stressið og álagið með því að grípa í lóðin í líkamsræktarsal Cosmos-hótelsins en þar er aðsetur Eurovision-hópsins.

Það gleymdist aftur á móti að taka með í reikninginn að borga þarf sérstaklega fyrir hvern og einn dag, litlar tvö þúsund krónur. Og kreppuþjáðir Íslendingar verða að hugsa um hverja einustu krónu. María segir þetta vissulega svekkjandi.

„Jóhanna og Yesmine Olsson nýta sér salinn á hverjum degi,“ segir María en ekki er útilokað að Yesmine taki restina af hópnum í útileikfimi að hætti Bootcamp í garði sem er í nágrenni hótelsins.

„Já, það ætla ég svo sannarlega að vona að hún geri enda nauðsynlegt fyrir þá sem eru á sviðinu með Jóhönnu að vera í góðu formi.“

María fer ekkert of fögrum orðum um hótelið en viðurkennir að miðað við mörg önnur hús í Moskvu þá sé það ekkert slor.

„Þetta hefur þótt fínt fyrir svona þrjátíu árum, enginn Hilton-stíll yfir þessu en voðalega dúllulegt, með blómamunstrum á rúmteppunum,“ segir María og virðist hafa gaman af.

Jóhönnu hefur annars gengið vel að vekja athygli á sjálfri sér. Sem skiptir miklu máli þegar í keppnina er komið. Hún var meðal annars í viðtali við rússneska ríkissjónvarpið í gær, fór á þjóðminjasafnið í höfuðborginni, klæddi sig í þarlendan þjóðbúning og söng bút úr laginu Is it True? á rússnesku.

„Þetta verður í fréttunum á föstudag og verður síðan notað til að kynna lagið.“freyrgigja@frettabladid.is