Breska skýrslan gæti hjálpað í samningum vegna Icesave

„Það er gott ef Bretar játa upp á sig skömmina að einhverju leyti. Jafnvel þótt seint sé, er það betra en ekkert," segir Steingrímur J. Sigfússon fjármálaráðherra um skýrslu breskrar þingnefndar sem kynnt var í gær. Í skýrslunni kemur fram að útskrift af samtali Alistair Darling fjármálaráðherra Breta og Árna Mathiesen, fyrrverandi fjármálaráðherra á Íslandi, staðfesti ekki að íslenska ríkisstjórnin hafi haldið því fram að hún myndi ekki virða skuldbindingar sínar.

Steingrímur sagði í samtali við fréttastofu að hann væri nýlega búinn að sjá fréttirnar og ætti eftir að skoða bresku skýrsluna. Hún yrði greinilega áhugaver lesning. „Það væri þó ekki verra fyrir okkur í framhaldinu í sambandi við samningaviðræðurnar að hafa hana úr þessari átt," segir Steingrímur um skýrsluna, en leggur þó áherslu á að hann eigi eftir að fara gaumgæfilega yfir hana.