Lífið

Vildu sýna á fal­legan hátt líkam­lega og and­lega nánd milli karl­manna

Stefán Árni Pálsson skrifar
Tvö dónaleg haust gefur út nýja plötu á næstunni.
Tvö dónaleg haust gefur út nýja plötu á næstunni.

Hljómsveitin Tvö dónaleg haust fagnar 30 ára starfsafmæli á þessu ári. Einnig slagar í tuttugu ár frá útkomu síðustu plötu sveitarinnar Mjög fræg geislaplata sem innihélt lög eins og Ljóti karlinn og Prakkararastrákur.

Í tilefni af því, stöðugum tónlistarlegum þorsta og þörfinni fyrir að skapa saman hefur sveitin nú í þrjú ár unnið að nýrri plötu um persónulega nústöðu sína í framrás tímans. Sú plata ber nafnið Miðaldra og er hárbeitt og húmorísk skoðun á veruleika okkar sem miðaldra karlmanna.

Lagið Ég er til er fyrsta lagið sem var samið fyrir plötuna Miðaldra. Guðmundur Ingi, söngvari samdi lag og texta og segir:

„Lagið er óður til þessarar 30 ára vináttu. Við, þessi 6-7 manna kjarni í Tveimur dónalegum haustum tókum algeru ástfóstri hver við annan þegar við kynntumst í Menntaskólanum á Akureyri. Við byrjuðum að rotta okkur saman þarna um 1990, þegar Sigfús trommari, sem er árinu yngri en við byrjaði í skólanum. Síðan þá höfum við farið saman í gegnum lífið, gegnum súrt og sætt, gleði og sorg og það magnaða við þennan vinskap er hversu sterkur sköpunarkraftur og lífshúmor er í honum. Í dag erum við búsettir í þremur löndum og einn á Akureyri, en ef það er gigg, mæta menn ef þeir eiga einhvern lífsins möguleika á því,“ segir Guðmundur.

Tryggvi Már gítarleikari og Ómar Örn básúnuleikari leikstýrðu myndbandinu og Tryggvi og Ernir Ómarsson bera ábyrgð á myndatöku en Tryggvi sá um eftirvinnslu og klippingu. Ómar og Tryggvi segja um myndbandið:

„Okkur langaði að fanga kjarnann í þessari vináttu. Okkur langaði í myndband sem sýndi á fallegan hátt að líkamleg og andleg nánd milli karlmanna er falleg og ekki feimnismál, að miðaldra karlmannslíkami er fallegur með allri þeirri lífsreynslu sem á honum má sjá. Einnig þessa ungæðislegu orku og gleði sem sprettur alltaf fram þegar við hittumst. Það má jafnvel segja að barnsleg einlægni og sköpunarþörf losni úr læðingi þegar við komum saman. Aldurinn hefur svo sannarlega ekki tekið það frá okkur,“, segja þeir félagar hlæjandi.

Platan Miðaldra er væntanleg í lok september. Útgáfutónleikar sveitarinnar fara fram á Hard Rock laugardaginn 7. nóv næstkomandi. Hér að neðan má sjá myndbandið.

Klippa: Tvö dónaleg haust - Ég er til


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.