Lokað verður fyrir rennsli heits vatns í Hafnarfirði, hluta Garðabæjar, efri byggðum Kópavogs og Norðlingaholti klukkan tvö í nótt. Lokunin stendur yfir í ríflega 30 klukkustundir eða til níu á miðvikudagsmorgun.
Í yfirlýsingu frá Veitum segir að verið sé að fjölga heimilum sem fái heitt vatn frá virkjunum á Hellisheiði og Nesjavöllum. Við það þurfi að sækja minna af heitu vatni í borholur Veitna í Reykjavík og Mosfellsbæ.
Nýja tengingu þarf við Suðuræð, eina af megin flutningsæðum hitaveitunnar á höfuðborgarsvæðinu.
„Með aukinni notkun á heitu vatni, m.a. vegna fjölgunar íbúa og þéttingu byggðar, hefur álag á jarðhitageyminn sem fæðir borholurnar á lághitasvæðunum aukist og við því verður að bregðast. Þessi framkvæmd er liður í því að tryggja að þessi mikilvægu lághitasvæði nýtast íbúum höfuðborgarsvæðisins til langrar framtíðar,“ segir í yfirlýsingunni.
Lokanir í Garðabær Hraun og Urriðaholt.
Lokanir í Garðabær Búðir og Lundir.
Lokanir í Kópavogi - Salir og Lindir.
