Dagskráin í dag: Stórmeistaramótið í CS, Gaupi hittir Bogdan, og gamlar rimmur Liverpool og Man. Utd

Beinum útsendingu frá íþróttaviðburðum hefur snarfækkað vegna útbreiðslu kórónuveirunnar eins og gefur að skilja. Til að mæta því hafa Stöð 2 Sport og hliðarrásir verið dagskrársettar með nýju dagskrárefni og endursýningum af safnefni til að stytta íþróttaþyrstum stundirnar.

Beinar útsendingar dagsins verða á Stöð 2 eSport, þar sem keppni heldur áfram á Stórmeistaramóti Vodafone-deildarinnar í Counter-Strike, og á Stöð 2 Sport 2 þar sem fremstu pílukastarar heims keppa á PDC Home Tour.

Á Stöð 2 Sport í dag er meðal annars hægt að sjá þátt um það þegar Gaupi, Guðjón Guðmundsson, hitti vin sinn og einn mesta áhrifavald í íslenskum handbolta, Bogdan Kowalczyk. Hægt er að rifja upp bikarleik Manchester United og Liverpool frá árinu 1999, sem og þegar liðin mættust í bikarnum árið 2006, auk Hestalífsþáttar um Áslaugu Örnu Sigurbjörnsdóttur dómsmálaráðherra og ýmislegt fleira.

Stöð 2 Sport 2

Á Stöð 2 Sport 2 verða sýndir þættir um Meistaradeild Evrópu og Evrópudeildina, sem og viðtalsþættir með nokkrum af stjörnum spænsku 1. deildarinnar. Þar verða einnig perlur úr sögu efstu deildar karla í fótbolta áður en að pílukastmóti kvöldsins kemur.

Stöð 2 Sport 3

Fleiri af bestu leikjum í sögu efstu deildar karla í fótbolta verða á Stöð 2 Sport 3 auk þátta um barnamót í fótbolta og bikarúrslitaleikja.

Stöð 2 eSport

Bein útsending frá seinna kvöldinu í 8-liða úrslitum Stórmeistaramóts Vodafone-deildarinnar í CS:GO hefst kl. 18 og stendur yfir langt fram eftir kvöldi. Fram að útsendingu verða sýndir leikir úr Vodafone-deildinni í vetur, í League of Legends.

Stöð 2 Golf

Á Stöð 2 Golf verða þættir um Einvígið á Nesinu árin 2006-2009, og forvitnilegir þættir um vísindin á bakvið golfíþróttina, ásamt fleiru.

Útsendingar dagsins má finna á heimasíðu Stöðvar 2.