Nígeríumenn æfir út í geimverumynd

Stjórnvöld í Nígeríu er æf vegna sýningar myndarinnar District 9. Kvikmyndin fjallar um aðskilnaðarhyggju suður-Afríkumanna gagnvart geimverum sem koma til jarðarinnar.

Nígeríumenn eru hinsvegar fokillir út í framleiðendur kvikmyndarinnar og segja hana sýna Nígeríumenn í neikvæðu ljósi. Meðal annars vilja þeir meina að myndin sýni þá sem mannætur, glæpamenn og vændiskonur.

Og ekki bætir úr skák að aðal illmennið í myndinni er hálfnafni fyrrum forseta Nígeríu, Olusegun Obasanjo. En illmennið gengur undir síðara nafninu í myndinni. Hann og gengi hans trúa því að þeir öðlist ofurhæfileika með því að borða geimverurnar.

Forsvarsmenn myndarinnar hjá Sony, hafna þessum ásökunum stjórnvalda Nígeríu og benda á hið augljósa; þetta er kvikmynd um geimverur og það er ekki eins og Nígeríumenn borði geimverur. Að auki er það með öllu ósannað að þær séu til yfir höfuð.