Hryðjuverk framin vegna sænskra hermanna og skopteiknara

Sænskum yfirvöldum barst tölvupóstur rétt fyrir hryðjuverkin í Stokkhólmi síðdegis í gær þar sem höfundur póstsins fordæmdi veru sænskra hermanna í Afganistan. Eins og áður hefur verið greint frá sprungu tvær bílasprengjur í miðborg Stokkhólms um klukkan fjögur í gærdag. Fjöldi Svía voru í miðborginni að kaupa jólagjafir.

Fyrri sprengingin varð á Drottningagötu en sú seinni aðeins um 300 metrum frá um 10 til 15 mínútum síðar. Þar virðist sem hryðjuverkamaðurinn hafi sprengt sig sjálfan í loft upp að auki. Sjónvarvottar lýsa því að ódæðismaðurinn hafi legið með sprungin maga á gangstéttinni.

Tveir Svíar slösuðust í árásinni. Ekki er vitað til þess hvort þeir hafi slasast alvarlega.

Aðeins augnabliki áður en sprengingarnar urðu fengu lögregluyfirvöld og sænskir fjölmiðlar tölvupóst sem talinn er vera frá hryðjuverkamönnunum. Í honum er vera sænskra hermanna í Afganistan fordæmd harðlega.

Í póstinum eru svokallaðir „Mujahideen" í Svíþjóð og víðar, sem eru íslamskir hermenn, hvattir til þess að rísa upp og berjast fyrir málstaði Íslam.

Þá er sænski teiknimyndahöfundurinn Lars Vilks einnig fordæmdur í póstinum. Lars komst í heimsfréttirnar í mars síðastliðnum þegar Colleen R. LaRose, oftast kölluð Jíhad Jane, frá Fíladelfíu í Bandaríkjunum, skipulagði tilræði gegn Lars.

Sænski listamaðurinn er réttdræpur í augum róttækra íslamista vegna þess að hann teiknaði Múhammeð sem hringtorgshund. Jíhad Jane var dæmd í lífstíðarfangelsi.

Lögreglan segist vera að rannsaka póstinn, en í augnablikinu segja þau höfund póstsins vera reiðan út í sænska hermenn í Afganistan og illt umtal um Múhammeð spámann.

Sænsk yfirvöld hækkuðu viðbúnaðarstig sitt vegna ótta við hryðjuverkaárás í nóvember síðastliðnum. Ástæðan var sú að sænskar sellur, sem grunaðar voru um að undirbúa árás á Svíþjóð, breyttu mynstri sínu þannig að sænsk lögregluyfirvöld sáu ástæðu til þess að bregðast við því.

Lögreglan hefur ekki greint frá nafni hryðjuverkamannsins sem lést á vettvangi. Þess má geta að Svíar eru með um 500 hermenn í Afganistan.