Óþverralegt athæfi sem verður rannsakað

„Þetta er óþverralegt athæfi og lögreglan mun gera allt sem í hennar valdi stendur til að upplýsa það,“ segir Árni Þór Sigmundsson, aðstoðaryfirlögregluþjónn á höfuðborgarsvæðinu, um níðingsverk sem unnin hafa verið á hryssum í Kjós. Lögreglan mun kalla eftir gögnum frá dýralækni í kjölfar athæfisins. Þá hafa lögreglumenn verið í sambandi við eigendur hryssanna til frekari upplýsingaöflunar. Unnið er að því að reyna að áætla hvenær atvikin áttu sér stað og hverjir voru að verki.

Um miðjan mánuðinn komu eigendur hrossa, sem verið hafa í hagabeit í landi Meðalfells í Kjós, á lögreglustöð og tilkynntu um áverka á þremur hryssum sem taldir eru vera af mannavöldum. Í öllum tilvikunum er um að ræða áverka á kynfærum dýranna, bæði utanverðum og einnig innvortis. Lögreglan hvetur eigendur hrossa til að fylgjast með þeim eins og kostur er og hafa tafarlaust samband við lögreglu í síma 112 ef grunsemdir vakna um dýraníð. Mikilvægt er að lögreglan geti strax kynnt sér aðstæður á vettvangi og aflað nauðsynlegra gagna. Jafnframt eru hlutaðeigandi beðnir um að fylgjast vel með mannaferðum við beitarhólf og halda til haga upplýsingum um ökutæki og mannaferðir.

Þeir sem kunna að búa yfir upplýsingum um atvikin hér að ofan eru beðnir um að hafa samband við lögreglu í síma 444 1190 á skrifstofutíma eða í síma 444 1180 þess utan.- jss