Veggjakrotarar greiði fyrir tjón

Hægt er að útrýma veggjakroti að sögn sérfræðinga með því að láta fólk greiða fyrir það tjón sem það veldur. Þetta hefur verið gert víða erlendis með góðum árangri, þar sem krot og krass á opinberum vettvangi heyrir nær sögunni til. Þrátt fyrir að samþykkt hafi verið í borgarráði árið 2002, í upphafi kjörtímabilsins, að gripið yrði til markvissra aðgerða gegn veggjakroti þá virðist lítið sem ekkert hafa verið aðhafst. Um alla borg má sjá krot og krass en þar sem veggjakrot verður seint flokkað undir stórglæpi hefur krotið engan forgang hjá lögreglu. Dæmi eru um að fólk víðs vegar úr borginni hafi séð til krotaranna, hringt í lögreglu sem annað hvort sinnti ekki útkallinu eða kom svo seint að þeir voru löngu á bak og burt. Tillagan sem samþykkt var í borgarráði kom frá Kjartani Magnússyni borgarfulltrúa og snerist ekki um hertari aðgerðir lögreglu heldur forvarnarstarf og að leitað yrði liðsinnis fyrirtækis eða aðila sem hafa sérfræðiþekkingu á þessu sviði. Slík fyrirtæki eru starfrækt, meðal annars öryggisisráðgjafafyrirtækið Meton þar sem fyrrverandi lögrelglu- og slökkviliðsmenn starfa. Þeirra á meðal er eini rithandasérfræðingurinn hér á landi og það er ekki síst sérþekking hans sem ætti að geta gagnast. Eiríkur Beck, framkvæmdastjóri Meton hf., segir að hægt væri að ná sökudólgunum á mynd við iðju sína, en veggjakrot sé nánast alls staðar eins og hægt sé að bera kennsl á veggjakrot eftir sömu persónuna á mörgum stöðum. Svo yrði viðkomandi krafinn um bætur fyrir allt sem hann hefði gert þegar hann næðist. Bótakrafan vofir þá yfir krotaranum en ekki sé rétt að refsa fyrir athæfið því refsing skipti ekki máli Aðspurður hvort reynt hafi verið að koma þessum aðferðum á framfæri við borgaryfirvöld segir Eiríkur að hann haldi að þau viti um fyrirtækið og þau geti kallað á það ef þau vilji. Eiríkur segir það mikinn misskilning að flestir veggjakrotarar séu börn og unglingar, þetta sé mun eldra fólk og þar dugi það eitt að láta viðkomandi borga fyrir skemmdarverkin. Það hefur sýnt sig að veggjakrotarar kosta samfélagið miklar fjárhæðir ár hvert. Sem dæmi má nefna að um fjörutíu milljónir króna fóru í að gera við skemmdir af þeirra völdum í Reykjavík einni árið 2003.